Nindot paminawon pero bati tan-awon?
Mag-concert ang Moffatts sa Cebu karong Biyernes sa Hoops Dome. Samtang ang Michael Learns To Rock mag-concert sa December 7 sa Waterfront Hotel.
Fan sad ko aning mga bandaha kay panahon ni namo sa `90s. Pero wa pa ba ni mausab ang ilang tingog?
Pareho ni Russell Hitchcock sa Air Supply nga maglisud na og abot sa iyang mga nota.
Nakakita sad ko sa concert nilang Stephen Bishop, Dan Hill, David Pomeranz ug England Dan, laina na.
Nindot lang paminawon sa CD pero sa live layo na kaayo sa tinuod. Pero kon fan gyud mo, ah sige go!
PROBINSYANO
Gusto sa Philippine National Police nga usbon ang plot sa Ang Probinsyano kay bad image na kuno kaayo ang mga pulis sa ilang teleserye.
Kon ako’y AC Martin, eh este Coco Martin, pabalikon na nako si Rowell Santiago sa Malakanyang isip presidente sa Pilipinas aron ang mga buotang pulis makabalik na sa serbisyo.
Ug kana si Edu Manzano patyon na na ang iyang karakter isip vice president Lucas Cabrera aron maka-move on na dayon ang estorya. Di ba?
DIE HARD
Ang mga naungo sa Probinsyano kato tingaling mga way lingaw o die hard fans lang gyud ni Coco Martin.
Pero sa tinuod puol na kaayo. Ang mga namatay mabuhi. Ang mga nahitabo sa una balik-balikon.
Pero kon wa pa na nila gilangay-langay ug giinat-inat ang estorya di tingali maalarma ang PNP.
Usahay maora na gu’g kenkoy ang Probinsyano kay wa na silay dialog. Tinan-away na lang.
Taas man gud kuno og rating mao nang gipatuyoktuyok. Sige tan-aw pa mo! Haha!
SUWERTE
Dihang gimabdos diay si Golden Cañedo sa iyang mama duna kunoy tiguwang nga niingon nga ampingi na ang imong gisabak kay mao nay maghatag ninyo og suwerte.
Si Golden Cañedo ang 16-anyos nga taga-Minglanilla nga maoy unang grand champion karon sa “The Clash” singing contest sa GMA-7. Si Golden nakadawat og P1 million cash prize, house and lot ug brand new car.
Unsaon niya paggasto ang iyang P1 million? Basaha ang atong chika ni Golden sa “Sssuper Ka” kay daghan siyag revelation. Maora bitaw siyag si Sarah G!
Si Golden nikanta sad niadtong Sabado atol sa GMA Regional TV’s Partners’ Appreciation Lunch nga gipahigayon sa Marco Polo Hotel, diin usa sa nakadawat og plaque of appreciation ang Superbalita.