As high as the heavens
Wa ko makatan-aw og diretso sa akong manghod nga si Sandra. Mao pay among pagsulod sa among kuwarto niadtong gabhiona. Duha ra ming magsuon ug pulos babaye. Usa ra ang among kuwarto apan tagsa mig kama. Nagsandig ko sa headboard sa akong kama samtang si Sandra nagtindog sa akong atubangan. Pulos na mi nagtungha sa college. Second year siya samtang ako third year. Usa ra ka tuig ang pagka maguwang ko niya.
Namatikdan ko nga naluoy gyud siya nako.
“Talagsaon gyud kaayo ang imong love kang Kuya Rommel, Te Sheena. Imagine, bisag pasakitan ka niya kanunay, gimahal gihapon nimo siya?”
“Sabta ko, Sandra. Unsaon man gud gipitik man gyud siya sa akong kasingkasing.”
Kahilakon ko apan nagpugong lang gyud ko kay di ko gusto nga mosamot ang bationg kaluoy sa akong manghod nako.
“I cannot afford to lose him, Sandra”
“God! Nganong siya pa man gyud, Te? Nganong di man si Kuya Alex? Buotan kaayo si Kuya Alex, uy, pero si Kuya Rommel ang imong gipili nga pulos konsumisyon lang ang gihatag nganha nimo. Super playboy nang lakiha.”
Namatikdan nako nga nasuko na si Sandra. Apan gipasagdan ko na lang siya sa iyang gibati kay concern man gyud siya nako isip iyang maguwang. Naghilom na lang ko.
Karibal sila si Rommel ug Alex sa ilang gugma nako. Silingan namo ni Sandra si Alex maong nasuheto mi sa kinaiya ani. Gikan sab kini sa maayong breeding nga pamilya. Samtang si Rommel gikaila ko lang sa eskuwelahan kay parehas man mig university nga gieskuwelahan.
Di man katudloan ang kasingkasing, kay kon si Alex pa ang akong love, siya gyud ang akong sugton. Apan unsaon nga si Rommel man ang gipitik sa akong kasingkasing bisag nakahibawo ko nga daghan siyag girlfriend? Gitan-aw ko na lang si Sandra nga mihigda sa iyang kama. Naghilom na lang sab siya. Tingali, nakamatikod siya nga di ko madala sa iyang mga pagtambag nako.
Gusto gyud sa akong manghod nga buwagan ko si Rommel. Na, kon maghunahuna pa lang gani ko sa pagpakigbuwag niya, mora na kog mamatay sa kaguol. Unsa na kaha kon tinuod nga magkabuwag mi?
Dugay kong nakatulog niadtong gabhiona. (SUMPAYAN)