Sakripisyo sa PBA
Mora og gibaraw ang nagkainit ug nagkanindot na unta sa naghinapos nga bahin sa PBA Governors’ Cup didto sa Kaulohan.
Sa naandan man gud, human sa semifinals round, isunod gilayon ang championship round aron dili mohupas ang interest sa mga nagsunod sa liga.
Sukwahi kini karon tungod kay maputol una ug modagan pa gani og duha ka semana sa dili pa kini mobalik alang sa championship series tali sa Alaska Aces ug sa Magnolia Hotshots.
Ang rason? Aron paghatag og kahigayonan nga makaensayo ang Team Pilipinas alang sa Fiba basketball World Cup Asian Qualifiers nga i-host sa nasod karong Nobiyembre 30 ug Disyembre 3 sa Mall of Asia Arena sa Pasay City.
Sa atong personal nga pagpakighinabi ni PBA Commissioner Willie Marcial sa usa ka dinner didto sa Kaulohan, uban sa atong mga higalang media sa Manila sa miaging semana, iyang giangkon nga gisayangan gyud siya sa sitwasyon kay diha na unta ang momentum sa kainit ug ka thrilling sa mga fans pero sa kalit lang mabugnaw kini kay taas-taas man ang gintang sa pagputol.
Apan wa siyay mahimo og mao ni mapadulngan, tungod kay sila sa PBA nakasaad ug nakakomiter na nga moitsa sa kinatibuk-an nilang suporta ngadto sa Philippines. Sukwahi sa niagi, dili na sila sa pagpadiki-diki sa paghatag kon unsa ang gikinahanglan.
Mao nga atong naobserbahan, nga kon kaniadto ubos ni coach Chot Reyes daghang mga star player nga dili moduwa sa national team, karon nagpunsisok na ang mga higanti ubos sa pag-coach ni Yeng Guiao.
Nakasinati man tuod sila og negatibo nga aspeto, apan ang positibong butang nga ilang nahimo mao nga nakapamatuod ug nakapakita sila sa ilang seryusong suporta sa national team alang sa international competition. Kini maoy gihangop ni Marcial.
“Sayang talaga. Makaapekto sa attendance natin. Pero ito ang sakripisyo ng PBA. Gusto sa taong bayan na suportahan natin ang national team and we give them a promise so ito ginawa natin. After all this is for the Filipino people,” matod ni Marcial kinsa nagsugod sa PBA isip usa ka chief statician ug nahimo usab nga media bureau head sa wala pa siya matudlo nga ikanapulo nga commissioner sa unang professional basketball league sa Asia.
Hinuon dako ang iyang pagtuo nga sa ilang gibuhat, makakuha ang PBA og dugang sempatiya sa publiko ug kini maoy tugbang sa sakripisyo.
Sa Disyembre 5 pa sugdan ang Alaska-Magnolia best-ofseven championship series.
Kabahin sa plano ni Marcial mao ang pagpahigayon og daghang provincial ug out-oftown games apan, maglisod pa siya sa pag-implementar niini sunod tuig tungod kay maapektohan man ang ilang schedules sa Fiba World Cup.
Basin sa 2020 kon mahapsay na ang dagan sa mga schedules sa PBA nga dili maapektohan sa petsa sa mga international competitions nga salmutan sa nasod, iya na kining mapatuman.
Misyon karon ni Marcial mao ang pagkabig og balik sa crowd sa PBA nga taodtaod na usab nagmingaw. Bag-o pa pman tuod siya apan aduna nay ginagmayng migimaw sa kalambuan.
Keep up the good work, Com. Thanks for the invite.