50 KA PAMILYA SA BUHISAN GIPUGOS SA PAGPABAKWIT
Gipabakwit sa Cebu City Disaster Risk Reduction and Management Office (CCDRRMO) ang 155 ka mga tawo nga nagpuyo sa 29 ka balay sa sityo Sandayong, Barangay Buhisan gumikan sa bagyong Samuel.
Ang pagpabalhin sa kapin 100 ka mga tawo nagsilbing pagpandandam sa epekto sa bagyo hilabi na sa kusog nga uwan dala ni Samuel.
Ang mga lumolupyo temporaryong gipahiluna sa sports complex sa Barangay Buhisan nga giila sa Mines and Geosciences Bureau nga landslide prone area.
Si Nagiel Bañacia, pangulo sa CCDRRMO, nagkanayon nga gisuportahan sa City Government ang mga bakwit pinaagi sa paghatag og bugas ug ubang pagkaon.
Gipaistambayan usab og ambulansiya ang dapit ug dunay giandam nga tambal ug medisina.
Ang barangay kapitan sa Buhisan nga si Gremar Barete nagkanayon nga sayo pa sa udto kagahapon, Nobyembre 20, ang Buhisan Action Response Team (Bart) nipahigayon na og rekorida aron mapahibawo ang mga tawo sa preemptive
evacuation nga gipatuman sa barangay alas 6 sa gabii.
Si Barete nagkanayon nga gipahigayon ang pre-emptive
evacuation gumikan sa kusog nga uwan sanglit ang tumoy sa bukid adunay nadiskobrehan nga liki epekto sa 6.9 magnitude nga linog niadtong 2013. Ang pangulo sa CCDRRMO niingon nga wala na silay laing gipabakwit gawas sa Buhisan sanglit ang Sirao nga delikado usab sa landslide, wa nay nagpuyo sa mga kuyaw nga dapit.
Sa social media page ni Mayor Tomas Osmeña, gipahibawo niini nga adunay mga ambulansiya nga gidestino sa Barangay Lusaran, Agsungot, Tabunan ug Taptap.
Laing lima ka heavy equipment sama sa backhoe, payloader ug dumptrucks para maoy moresponde sa higayon nga adunay landslide ug pagkatumba sa kahoy sa kabukiran.
Laing rescue team ang nakaistambay sa T. Padilla para sa north district ug Mambaling para sa south district sa higayon nga adunay mangayo og tabang.
KON MOAWAS ANG DAM
Ang Bart nisusi sa dam nga nahimutang sa ibabaw sa ilang barangay.
Nasuta nga adunay pay igong lugar sa tubig sa higayon nga mobundak ang kusog nga uwan.
Apan gipadayag ni Barete nga kon moawas na ang dam, ilang pabakwiton sa barangay gym ug barangay hall ang 50 ka mga pamilya nga nagpuyo daplin sa sapa aron masiguro ang ilang kaluwasan.
Matod ni Barete nga labing maayo nga mangandam ang katawhan ug di maghuwat nga moabot pa ang kalamidad. /