Online booking sa whale watching gihunong
Kapitolyo nipahunong sa bag-o lang gipatuman nga online booking o reservation alang sa whale shark watching activity sa lungsod sa Oslob.
Kini human nga matod pa, pabor lang kini alang sa mga tour guide o operator nga nagbase sa dakbayan sa Sugbo ug alkanse ang local tour guides ngadto mismo sa maong lungsod.
Subay niini, ibalik una sa pagpatuman ang naandan nga pagdawat ug 1,000 ka mga bisita matag adlaw, nga walay prior booking.
Gitug-an ni Bise Gob. Agnes Magpale nga mismo si Mayor Jose Tumulak sa Oslob ang nipaabot ngadto kang Gob. Hilario Davide III sa reklamo sa mga local tour guide labot sa pagka-alkansi nila sa bag-ong gipatuman nga online booking o reservation.
Sa miaging buwan, gipatuman ang advanced booking online human nga giminusan ngadto sa 800 lang ka mga bisita ang mahimong dawaton alang sa whale shark watching matag adlaw.
Apan matod ni Magpale, nireklamo niini ang mga local tour guide kay alkanse sila ug mas nakahatag kini ug bentaha sa mga tour guide nga nagbase sa dakbayan sa Sugbo kay mas daghang turista ang moduol o magpa-book kanila.
Tungod niini, ibalik lang una sa pagpatuman ang naandan nga pagdawat ug 1,000 ka mga bisita matag adlaw, bisan paman ug way prior booking.
“Favored kuno kaayo ang city tour guides sa bag-ong setup. We don’t want that to happen,” sigon ni Magpale.
Gihulagway ni Magpale nga balido ang reklamo sa mga tour guide busa pangitaan kini ug solusyon sa technical working group aron mas mapalambo ang operasyon sa whale shark watching sa Oslob.
Gusto ni Magpale nga dunay patas nga kahigayunan ang tanang tour guide, lokal man o city-based.
“Usahay bitaw inig implement nimo, adto na nimo makita ang defects,” matod sa bise gobernador sa Superbalita Cebu.