Nasudnong Pinulongan
Tinuon nato. Kining Filipino nga giingong atong Nasudnong Pinulongan di ba Tagalog? Kon atong hilngon, litukon o kaha usapon sa ibabaw o sa ubos bisan sa kilid, Tagalog gayud.
Ang 1986 Freedom Constitution nagkanayon sa Ingles: “The national language of the Philippines is Filipino. As it evolves, it shall be further developed and enriched on the basis of existing and other languages.”
Tiamo na, wa kini mag-ingon nga Tagalog. Busa usa ka pagsupak sa atong constitution o batakang balaod kon ang Tagalog maoy ilhon nga Filipino.
Gianad man gud ta sa imperial Manila. Ang 1935 Commonwealth Constitution nagbuot nga ang atong national language i-base sa usa sa atong lumadnong (native) pinulongan.
Gipahimuslan dayon ni sa mga Tagalog. Si Pamuno Manuel Quezon mipakanaog dayon og Order Ehekutibo nagbuot nga ang Tagalog maoy nasudnong pinulongan.
Gitudlo dayon ni sa mga tulonghaang elementarya, high school ug sa mga kolehiyo sa tibuok nasod. Dinhi nisugod ang kalig-on sa pinulongan aron tawgon og atong national language.
Unang nisagop ang 1973 Constitution ni Marcos sa Filipino nga atong kumon national language, apan hilom sa ubang mga pinulongan.
Di sama sa Freedom Constitution ni Cory Aquino nga naglabot ug naglakip sa ubang mga lumadnong pinulongan nga kabahin gayud sa Filipino.
Lisod nga matawo ang tiunay gyud nga Filipino nga saksak-sinagol sa 70 ka mga pinulongan sa nasod. Duol ni sa imposible, matod pa. Lisod. Mao nang saguyod lang ta gihapon pag-ila sa Tagalog.
Sa tigom sa 1992 sa Capitol atubangan sa mga DepEd ug Capitol officials, writers ug professionals akong gisugyot ang Special Filipino Community nga langkuban sa mga newly-wed gikan sa nagkadaiyang pinulongan.
Ang kagamhanan maoy mogasto sa tanan: pagkaon, tukod og ospital, eskuylahan ug ubang gikinahanglan. Usa ka free community sud sa 20 years.
Ang pinulongan unya sa ilang mga anak maoy matawag nga Filipino. Nangatawa sila abig tiaw ko lang . Karon sugod nag tinga ang Tagalog. Malipay ko kon di na ni itudlo sa eskuylahan kay wa pa may Filipino.