TALK TO PAPA JOE
Gisalikway
Dear Papa Joe,
Ako diay si Gina, 26 years old, taga Pasil, Cebu City. Usa ko ka anak sa gawas. Bali kamanghuran sa upat ka mga managsuon.
Dihang ga college ko, gipailaila na ko ni Papa sa iyang pamilya ug sa tinuod lang, klaro kaayo nga wa sila makauyon nako, labi na nga di ko insik og hitsura kay sila insik man og kaliwat ang ilang mama. Giantos lang nako ang tanan bisan mura na ko og katabang nila sa panimalay, labi na wala si Papa ug di sad siya kapangasaba sa iyang mga anak kay sad-an man siya. Labi na gyud akong ina-ina nga maypa ang tuko, makit an pa, ako kay labay labayan lang.
Hangtod nga niabot ang panahon namatay si Papa sa atake siguro sa iyang gidala nga kaguol sa iyang nabuhat sa iyang pamilya ug namo sa akong mama. Ang nahitabo karon kay palayason nako nila sa balay kay wa daw koy katungod didto kay anak ra ko sa gawas. Pero asa man ko mopaingon nga wala naman sad akong mama? Taud taud na sad ni namatay? Bisan kaluoy, wala gyud sila mohatag kutob nalang daw ko karong tapos buwan. Unsa may angay buhaton nako? Palihug tambagi ko.
GINA
Gina,
Sa tinuod lang, kon wa ko masayop, naa gihapoy bahin ang anak sa gawas. Naay porsyento niini. Kana kon gi acknowledge gyud ka sa imong papa legally. Pero kon wala, murag taas taas gyud na nga proseso kay kinahanglan man gyud nimo I-prove nga kadugo mo ug pinaagi na sa DNA, gasto kaayo. Mao duol ka og abogado. Pero kon di ka ganahan og gubot, ang mas maayo nimo buhaton paninguha og imo. Nakaeskwela man gyud kaha ug sakto naka sa edad, apply na lang og trabaho. Bisan gamay lang sa nga trabaho. Hangtod makabarug na gyud ka sa imong kaugalingon.