Makililimos nga dako’g lawas

Managhigala silang Aro ug Aldo. Naglakaw sila sa dalan Colon dihang may misugat kanilang usa ka tawo nga nangayog limos. Mikuot si Aro sa iyang ‘coin purse’ ug gihatagan og tibuok diyes pesos ang tawo.

“Gihatagan lagi to nimo’g P10, Bay!’ matod ni Aldo samtang ginuntan pagtan-aw ang tawo nga dako’g lawas nga nagpakilimos nilang duha ni Aro bag-uhay lang. Wa gyud niya tagai bisag peso.

Ang tawo nagpadayon pagpakilimos sa mga tawo’ng iyang masugatan ug sa nagatang og dyip nga kasakyan sa dalan Colon ning ‘rush hour’ sa alas siyete sa kagabhion.

Si Aldo ug si Aro padulong nga molabang ngadto sa Metro Gaisano aron mangita’g ika-regalo sa kasal ugma sa ilang superbisor sa usa ka ‘call center’ sa IT Park diin sila nagtrabaho. Ang ilang superbisor adto kasla sa lugar niini sa Sto. Tomas de Villanueva Parish Church, Talaga, Argao, Cebu.

“Mao nang magpakilimos, Bay, kay kabos mang mga tawhana! Naanad na lang sa pagpakilimos. Sila ra baya’y hinungdan nganong pobre sila. Kadako adto’g lawas. Nganong di man manarbaho?” padayong tagawtaw ni Aldo bisa’g diha na sila sulod sa department store, sa kitchenware section.

“Pero, mayna lang nang mangayo, Bay, kaysa mangawat. Unya, mas maayo sab nga kitay mohatag kaysa kitay hatagan. Di ba? It’s better to give than to receive!” ni Aro nga naghiling sa ‘rice cooker’ nga maoy iyang napiliang paliton.

“Aw, oo, nuon. Pero di gihapon maayo, Bay, uy! Mao man god nay magtuklod nila nga magsalig na lang pagpangayo kay way hago,” ni Aldo nga naghiling-hiling pod sa ‘oven toaster’ nga mao poy iyang napilian nga paliton.

“Lisod pod baya kanang ilang gibuhat, Bay,” ni Aro.

“Unsa god tawo’y nakalisod ana?” ni Aldo.

“Bi, ikaw kunoy pangayo og kuwarta sa mga tawo sa kadalanan, lalim ba!” ni Aro. “Suwayi lang.”

“Ha? Di gyud nuon ko! Kauwaw ana!” daling pamalibad ni Aldo.

“Mao nay nakalisod, Bay! Ang kauwaw intawon maoy ilang puhonan. Nagpabaga sa ilang nawong aron makakaon ilang tiyan!” ni Aro nga nahimuot sa reaksiyon sa nawong sa iyang amigo.

“Hapit na man diay manira, Bay. Tana uy! Adto na ta sa ‘counter’ aron mobayad,” palain ni Aldo aron putlon ang ilang estoryahay bahin adtong makililimos nga dako og lawas.