Paggamit sa apilyedo sa amahan (Part 1)
Dear Atty. Joan,
Ako si Grace. Mangayo unta ko og tambag kanimo, bahin kini sa akong mga anak. Duha na ang among anak sa akong partner, pero dili mi kasado.
Ang akong kamaguwangan nga anak kay wala ni siya narehistro. Karon ako na unta ni siya iparehistro apan niana man ang taga civil registrar sa among lungsod nga dili kini makadala sa apilyedo sa iyang papa kay lagi dili mi kasado.
Unsaon man ni nako, Atty. Joan, nga tanang record sa ako anak kay ang apilyedo baya sa amahan ang iyang gidala. Ang iyang manghod nga nauna hinuon namo og rehistro niadtong 2014 kay nakadala man sa apilyedo sa iyang amahan. Please tabangi ug tambagi ko.
Salamat.
Grace Dear Grace,
Ingon sa atong balaod Republic Act 9255 (“An Act allowing illegitimate children to use the surname of their father, amending for the purpose Article 176 of Executive Order no. 209, otherwise known as the Family Code of the Philippines”), nga ang ilehitimong anak kay pwede mogamit sa apilyedo sa ila amahan kung ang bata kay giila sa amahan nga iyang anak pinaagi sa birth record nga makita sa civil registrar o kung ang pag-angkon sa amahan nga iya siya ang kay nakabutang sa usa ka public document o kung naay private handwritten instrument na gihimo sa amahan.
Busa para magamit sa imong anak ang apilyedo sa iyang amahan mungsumiter ka ngadto sa inyong local civil registrar og Affidavit to Use the Surname of the Father (AUSF). Ang AUSF kay usa ka affidavit na gibuhat nga nagtugot nga pwede gamiton sa bata ang apilyedo sa amahan. Kaning AUSF kay ubanan og Affidavit of Acknowledgment o pwede sad og Private Handwritten Instrument (PHI). Pwede sad mungkuyog ang amahan sa bata inig parehistro unya mopirma sa acknowledgment nga naa sa likod sa birth certificate.
Atty. Joan
Pahibalo: Kini opinyon lamang nga nag-base sa inyong lakbit-saysay. Kini pwede mausab sa dugang pa nga mapatin-awan ang detalye. Kon kamo duhay pangutana bahin sa katungod sa mga bata, mahimo kamong mo-message sa among Facebook account Children’s Legal Bureau, Inc.