508 BAKWIT; 1,579 STRANDED

Tungod sa bagyo; norte sa Sugbo girumbo sa bagyong Samuel

Gatusan ka mga tawo ang namakwit sa mga luwas nga lugar samtang nagpadung ang bagyong Samuel sa Central Visayas Martes, Nobiyembre 20.

Tungod niini, sukad pa niadtong Lunes, ang Police Regional Office 7 (PRO) 7 naka

full alert status aron mapangandaman ang pag-igo ni Samuel sa Sugbo.

Liboan ka mga pulis ang giandam isip mga search and

rescue personnel kon adunay nanginahanglan og tabang.

Tungod niini tanang police nga naka duty nag sul-ob og uniporme nga pang search and rescue.

Matod ni PRO 7 Director

Chief Superintendent Debold Sinas nga adunay nakaestambay nga kapin sa 1,600 ka mga pulis sa tibuok rehiyon gawas sa kapin 100 ka mga pulis gikan sa Regional Mobile Force Battalion-7.

Sa monitoring sa Regional Tactical Operation Center sa PRO-7 alas 4 sa hapon kagahapon, mokabat na sa 508 ka mga tawo ang namakwit sa mga lalawigan sa Sugbo ug Bohol.

Samtang sa uwahing update sa Philippine Coast Guard (PCG) 7 sa mga stranded nga mga pasahero sa nagkadaiyang mga pantalan sa Sugbo kagahapon, moabot na kini og 1,579 ka mga tawo samtang wala pabiyahea ang 128 ka

rolling cargoes, 74 ka basko ug 11 ka motorbancas. Adunay giandam nga 799 ka

evacuation centers ang mga lokal nga kagamhanan sa tibuok rehiyon: 99 sa Bohol; 138 sa Siquijor; 272 sa probinsya sa Sugbo ug 290 sa Negros Oriental.

NAGA

Gipatutokan ni Sinas ang Dakbayan sa Naga human sa dakong trahedya nga niigo sa Barangay Tinaan, sa dihang nidahili ang bukid nga niresulta sa kamatayon sa dul-an 100 ka mga tawo.

Iyang giklaro nga ang lokal nga gobyerno sa Naga City uban ang kapulisan nagka uyon nga wa nay gitugotan nga tawo nga makasulod sa

ground zero aron makalikay sa disgrasya.

“Accordingly, nag meeting na sila didto. Naa silay pre-emptive evacuation ug ilaha na gyud gibantayan ang kadtong landslide area didto nga walay makasulod just in case kusog ang ulan,” matod ni Sinas.

Gipagawas na usab sa PRO-7 ang ilang kagamitan sama sa pisi, pala, piko, gabas, flashlights ug rubber boat alang sa rescue operation.

Giandam usab sa PRO-7 ang 6x6 nila nga sakyanan sa RMFB-7.

SIMBAHAN BUKAS

Si Cebu Archbishop Jose Palma nanawagan sa publiko di lang sa pag-ampo, kundi sa kanunay nga magbinantayon. Samtang mga simbahan,

rectories ug ubang pasilidad iyang gipahibaw nga bukas kon ugaling gikinahanglan ilabi na kon adunay mga bakwit.

Pangaliyupo ni Palma nga wa lay kadaot nga ibilin ang bagyong Samuel.

Iya usab gimanduan ang mga

parish priest nga mahimong abri ang mga simbahan ug gymnasium kon ugaling gikinahanglan alang sa mga evacuees.

WAY KLASE

Way klase karong adlawa sa mga publikong tunghaan sa preschool, elementary ug high school sa Sugbo gumikan sa bagyo.

Ang Siyudad sa Sugbo, Mandaue ug Kapitolyo padayong ningdeklarar nga way klase mga publikong tunghaan.

Karong buntag niigo ang bagyong Samuel sa Sugbo.

Kagahapon, matod ni Philippine Atmospheric, Geophysical and Astronomical Services Administration (Pagasa) Visayas officer-in-charge Engr. Al Quiblat nga makasinati og mas kusog nga uwan ang Sugbo sugod kagabii hangtod karong buntag.

Unang landfall sa bagyo sa Eastern Samar ug Dinagat Island kagabii.

Ikaduhang landfall karon sa Metro Cebu o sa Northern Cebu.

Human sa Sugbo moagi

kini sa Nothern Negros ug sa Southern Panay Island.

Gilauman nga magdala kini og 50 millemeters nga uwan o 7.5mm ngadto sa 15mm matag takna.