Bul-og sa mga deboto nakatrapik; Palma midayeg
Nilanat og pito ka oras nga nabara ang trapiko sa mga sakyanan sa dakbayan sa Lapu-Lapu sa dihang gisugdan ang solemn procession sa imahen sa Birhen sa Regla sa kadalanan sa Barangay Poblacion, niadtong Nobiyembre 20.
Si Fr. Bernard “Bong” Corpuz, kura sa Nuestra Señora Virgen de Regla National Shrine, nagkanayon nga nagmalinawon ang mga kalikokan sa kapistahan taliwala sa pag-uwan uwan ug sa barado nga trapiko.
Saysay sa deputy chief sa City Traffic Management System (CTMS) Roderick Daño nga sa dihang gisugdan ang procession sa mga alas 4:30 sa hapon Nobiyembre 20, gi-divert ang traffic route human gisira ang bahin sa M.L. Quezon Highway nga mopaingon sa Poblacion.
Ang mga sakyanan nga gikan sa duha ka tulay, inay molahos, gipasubay sa M. Patalinjug Avenue lapos sa Hoops Dome area, samtang ang nanukad sa Babag nga wa na sab makalahos kay gipa-divert sa dalan S. Osmeña.
Samtang procession gihugpaan sa 20,000 ngadto na sa 30,000 ka mga deboto sa Birhen sa Regla.
“Nag-abot gyud ang ulo ug ikog sa procession, plus nibaga ang trapik,” matod ni Daño.
Dugang pa ni Corpuz nga ang pagdeklarar nga way klase ug trabaho gawas nga holiday sa dakbayan gumikan sa kapistahan, ang bagyong Samuel nakadugang sa daghang tawo.
Kagahapon, Nobiyembre 21 gihulagway nga manageable ang trapiko apan ang bul-og sa tawo midaghan ilabi niadtong wa makadagkot niadtong bisperas gumikan sa hulga sa bagyo.
ANGAY SUNDON
Pagka-diyosnon ni Birhen Maria angay panaminan sa mga deboto hinungdan nga gipili sa Diyos nga mopanamkon ni Hesu Kristo.
Tungod niini, angay pasidunggan ang Mahal nga Birhen.
Mensahe kini ni Cebu Archbishop Jose Palma atol sa pontifical mass sa kapistahan sa patron nga Nuestra Señora Virgen de Regla nga gipahigayon kagahapon, Nobiyembre 21, sa maong national shrine sa Lapu-Lapu City.
Matod niya ang mithi ni Mama Mary, diin ang mga pulong sa Diyos diha nang daan sa iyang kasing-kasing, hinaot nga sundon sa mga deboto ilabi na sa ilang hugot nga debosyon ngadto sa maong patron.