MGA PARI NAGTIGI SA PAUGNAT-SA-KUSOG

Gatusan ka mga pari ang nisalmot sa usa ka adlaw nga tigi sa nagkadaiyang paugnat- sa-kusog niadtong Martes, Nobiyembre 20, diin gigrupo sila ngadto sa matag distrito.

Mismo si Cebu Archbishop Jose Palma maoy nangulo sa maong kalihukan ug nipailog sa bola isip simbolo sa pagsugod sa mga duwa.

Adunay kapin sa 10 ka sports ang gisalmutan sa mga pari, sama sa basketball, volleyball, badminton, lawn tennis, chess, ug uban pa.

Gitug-an ni bishop Palma nga kabahin kini sa mga programa nga giandam sa mga pari alang na sa paghinapos sa Year of the Clergy. Tapuson ang Year of the Clergy karong Domingo, dungan sa kapistahan sa Christ the King ug mao usab ang pagsugid sa Year of the Youth.

“Maayo usab kini nga activity to let our priests be reminded of the importance of their health. Kinahanglan naa mi sa good health in order to serve more the people of God. This is a good avenue. Almost all can join,” pamahayg ni bishop Palma.

Gawas sa sports fest, anaa usab ang libreng’ massage, ug palimpyo sa kuko, alang sa mga pari nga gusto mas ma-relax.

Sa pagkagabii, gihimo usab ang choral contest ug tigi sa mga balak, diin ang mga contestant ang mga pari.

Matud ni Fr. Joselito Gutierrez, usa sa mga nag-organisa sa kalihukan nga usa kini ka paagi nga mahatagan og higayon ang mga pari nga ma-relax bisan sa makadiyot. Makatabang usab nga mas makahuna-huna og tarong aron sa pagsulbad sa mga problema diha sa kada parokya o gidala nga organisasyon.

Ug paagi pagpahinumdom nga matag usa kanila aron andam kanunay sa pagpangalagad sa katawhan, angay lang nga aktibo ug lig-on pa ang panglawas ug ang mga paugnat sa kusog ang dakung makatabang.