‘TERORISTA’ MISUKOL, GIPATAY

NAMALIGYAG ARMAS SA ORMOC; ‘SAKOP’ SA TERORISTANG ISLAMIC STATE

■‘TERORISTA’. Nagligdas nga patay na si Joseph Anulga, alyas Dawud, nagpuyo sa Sityo Lawis, Barangay Airport, Dakbayan sa Ormoc human mapatay sa kapulisan ug mga sundawo sa Huwebes, Nobiyembre 22. Si Anulga giingong nisukol dihang dakpon na unta. Nakuha gikan kaniya ang usa ka improvised explosive device (sukip nga hulagway). Estorya sa pahina 2.

Ormoc City, Leyte--Patay sa giingong engkwentro tali sa kapulisan ug kasundalohan sa Ormoc City ang usa ka gituhoang terorista Huwebes sa buntag, Nobiyembre 22.

Giila ang napatay nga si Joseph Anulga, alyas Dawud, nagpuyo sa Sitio Lawis, Barangay Airport ning dakbayan.

Si Anulga kanhi overseas Filipino worker (OFW) sa usa sa mga nasod sa Middle East.

Napatay si Anulga human giingong nisukol sa Criminal Investigation and Detection Group (CIDG) 8 pinangulohan ni Superintendent Marvin Pedere ug sa Philippine Army.

Base sa joint intelligence sa militar ug kapulisan, sakop sa Dawlah Islamiya Terrorist Group ug nalambigit usab sa

gun running si Anulga. Kagahapon, ang kapulisan, pinaagi sa usa ka undercover

buyer, mipalit og kalibre. 45 nga armas kang Anulga nga kantidad og P12,000.

Giingong nakabantay si Anulga nga awtoridad iyang ka transaksyon, giingong nibunot kini sa iyang armas.

Usa ka pulis ang gikataho nga naigo, apan wa madutli kay naka bullet proof vest.

Mibawos ang kapulisan ug didto napatay si Anulga.

Sa pagsuwat ning taho, wa pa makahatag ang kapulisan og impormasyon diin ang mga samad ni Anulga.

Ang Siyudad sa Ormoc duna lay tulo ka oras nga direktang biyahe sa fastcraft sa Dakbayan sa Sugbo.

KINSA SI ANULGA?

Si Anulga bag-o lang nibalhin sa Islam ug gikatahong nang recruit og mga tawo sa Ormoc nga mobalhin sa Islam.

Niadtong 2016, nasayran sa kapulisan nga niabot siya ning siyudad.

Matod ni Capt. Salve Evangelista, public information officer ( PIO) sa 802 Brigade sa Philippine Army, si Anulga kanhi OFW sa usa sa mga nasod sa Middle East, diin gituohan nga siya na-convert gikan sa pagka Kristiyanos ngadto sa pagka Muslim.

Ang iyang mga silingan niingon nga naghisgot si Anulga nga duna siyay asawa sa Lanao, apan wa mosulti kon asa nga partikular nga dapit.

Sa Mindanao, dunay Lanao del Norte ug del Sur.

Si Evangelista niingon nga nibutyag si Anulga sa iyang mga silingan nga nauli na siya sa Pilipinas.

Matod ni Evangelista nga gikatakda nga moadto sa Mindanao si Anulga aron moapil na sa terrorist group ug mamatay isip martyr . Dugang sa intelligence report, direktang konektado si Anulga kang Yusuf Macuto, kinsa responsable sa napakyas nga pagbomba sa U.S Embassy niadtong Nobyembre 2016. Si Macuto usab ang main suspect sa pagbomba sa usa ka

boxing event sa Hilongos, Leyte niadtong Disyembre 2016 nga nakaangol og kapin 30 ka tawo.

ANG DAWLAH ISLAMIYA

Ang Dawlah Islamiya o Islamic State in Southern Philippines nakig-alyansa sa Islamic State of Iraq and Syria (ISIS).

Kauban nila ang Maute Group, Daulat Ul Islamiyah, Islamic State of Lanao ug Ansar Al-khilafah Philippines.

Taktika sa grupo ang kidnapping, bombing, extortion,

pagpamutol og ulo ug ubang brutal nga krimen.

EBIDENSYA

Narekober sa kapulisan gikan kang Anulga ang duha ka kalibre .45 nga pistola, mga bala, improvised explosive device

(IED), detonator ug motorsiklo.

Matod ni Philippine Army, 802nd Brigade Commander, Brigadier General Lope Dagoy, ang pagkamatay ni Anulga nagpakita lang nga way hunong ang ilang operasyon batok sa mga terorista aron protektahan ang katawhan.

“Anulga’s death shows the government’s conviction in protecting the people from these lawless elements. This is a clear message that your AFP and PNP will not allow neither tolerate terror groups in our midst,” matod ni Dagoy. Mapasalamaton si Ormoc City Mayor Richard Gomez sa aksyon sa awtoridad ug gisiguro nga walay lugar sa dakbayan ang bisan kinsang dunay dautang tuyo.