Taytayan sa Sibonga nalungag, naayo na

Nahuman na og ayo ang Dumlog Bridge sa Barangay Simala, lungsod sa Sibonga, habagatang Sugbo sa Huwebes, Nobiyembre 22.

Ang konkreto nga taytayan nga wala pa pormal nga ma-turn over sa contractor nga QM Construction ngadto sa Department of Public Works and Highways (DPWH) nga bag-o lang nahuman karong tuiga, ang gipaubos sa emergency repair human dunay lungag nga nakit-an sa northbound lane niini ug duna usab mga liki. Matod ni Jonathan Tumulak,

focal person on traffic management sa kagamhanan sa lalawigan sa Sugbo, nga base sa gipahibawo niya ni Engr. Jun de la Cruz, pangu sa Maintenance Division sa DPWH 7, natapos na ang pag-ayo sa taytayan ug mahimo na kini maagian duha ngadto sa tulo ka adlaw human gisugdan og trabaho niadtong Miyerkules sa gabii, Nobiyembre 21. Sa kasamtangan, ang southbound lane lang una ang gigamit diin nagpuli-puli og agi ang mga sakyanan nga mopaingon sa habagatang Sugbo ug siyudad sa Sugbo.

Kon maghuot ang dagan sa trapiko sa dapit, ang gagmay nga mga sakyanan nga paingon sa south, mo-right turn padung sa Simala Shrine, lahos sa Lindogon ug mogawas sa Sityo Bagakay paingon sa national highway.

Sigon ni Damiano Ofqueria Jr., local disaster risk reduction and management officer (LDRRMO) sa Sibonga, dul-an sa 10 ka pulgada ang dayametro sa buslot sa taytayan nga nakit-an Miyerkules sa gabii.

Matod niya nga hayan dunay deperensiya sa pagsagol sa semento o giingong hilaw ang pagkamasa sa taytayan.

“Kon sa local term pa na sa pagmasa, ampao ang tawag nila, kanang hilaw pa,” dugang ni Ofqueria.

Ang maong taytayan naguba human niigo ang bagyong Seniang sa Sugbo niadtong Disyembre 2014 diin gigahinan kini og P60 milyones alang sa pagpatukod og balik sa konkretong taytayan.

Gawas sa Dumlog bridge, dunay duha ka landslide ang niigo sa Sibonga sa mga barangay Banlot ug Bae diin nihumok ang yuta tungod sa uwan nga dala sa bagyong Samuel.

Sa Barangay Banlot, dili pa maagian ang karsada nga agianan sa mga mag-uuma nga motumod sa ilang mga produkto kay dunay dakong bato nga nagbabag nga nadala sa pagdahili sa yuta.

Samtang, siyam ka mga indibidwal gikan sa tulo ka mga pamilya ang gipabakwit sa Barangay Bae tungod kay naa sila manimuyo walo ka metros gikan sa nidahili nga yuta sa bakilid nga bahin sa dapit.