CORAL GARDEN SA LOON
Pananglitan ganahan ka magsuroy-suroy sa Bohol, adunay lugar nga pwede ra nimo dalikyaton. Wa kay laing buhaton kon di ang mangangha sa kanindot sa imong makita. Ug ang mag-selfie pud diay.
Mao kini ang Coral Garden nga nahimutang sa Barangay Cantaongon sa lungsod sa Loon.
“Nadiskubrehan” ni siya sa niaging tuig sa mga lumolupyo sa Barangay Cantaongon. Nati- ngala sila nga adunay nanubo sa seabed dinhing dapita.
Niadtong Oktubre 15, 2013, naigo og linog nga 7.2 magnitude ang lungsod sa Loon ug ubang parte sa Bohol ug Cebu. Tungod sa kakusog sa linog, ang dagat sa pipila ka dapit sa Bohol nisaka og singko metros tungod sa paglihok sa North Bohol Fault, matod pa sa report sa Philippine Institute of Volcanology and Seismology (Phivolcs).
Nisaka ang dagat tungod kay ang sea bottom niirog pataas.
Mao ni ang nahitabo sa Loon. Pagliwas sa linog, nawala ang dagat ug nakita na ang seabed. Upat ka tuig ang nilabay sukad sa linog, wa gihapon mubalik ang dagat apan adunay mga tanom nga nanubo.
Daw sama sa gitabunan og
carpet ang seabed sa Barangay Cantaongon. Gituboan na diay ni og gitawag nga carpetweeds o aizoaceae. Mura ni siya og
succulent plant, kanang silingan sa cactus ba nga ibutang sa cute nga mga kaang.
Tungod kay nilapad naman ang shoreline sa Loon human sa linog, mabulukon tan-awon ang carpetweed nga gasagol ang mga kolor--red, orange, yellow ug green. Mura ka og nag-”autumn in Loon, daplin sa dagat.”
To the max gyud ang imong selfie dinhi sa Coral Garden. Abi sa mga unang nakakita ug nakaari dinhing dapita nga
corals ang nanubo, maong gitawag ni nga Coral Garden.
Gikan sa Poblacion sa Loon, pwede ra magtraysikol paingon didto. Ang Loon pwede agion via Tagbilaran City o Tubigon. /