Nganong dili pasirad-an?
Daghan nang mga commercial establishments dinhi sa dakbayan sa Sugbo nga gipasiradan sa “kanhi laos nga pulitiko” gumikan kay wala mobayad sa insaktong bayrunon sa buhis samtang ang uban wala makalukat og permit. Sa dili pa maka-operate ang usa ka commercial establishment gikinahanglan usa kini nga molukat og mga permits sa City Hall.
Kon bag-o ang building gikinahanglan nga molukat og building permit gikan sa Office of the Building (OBO) sa dili pa kini makatukod. Dayon occupancy permit ug dayon business permit sa dili pa kini maka-operate o maka-negosyo. Illegal ang pag-operate sa usa ka establishment o patigayon kon wala kini business permit.
Gipasirhan sa “kanhi laos nga pulitiko” ang Rico’s lechon gumikan kay ang tag-iya niini wala mobayad sa insaktong buhis. Apan klaro kaayo nga personal ang katuyuan gumikan kay ang original nga tagiya miundang man sa pagpakig-kasosyo sa asawa sa iyang anak. Iyang gipasirad-an ang Vic Enterprises gumikan sa daghang mga reklamo sa kaabog ug ka-traffic sa lugar diin kini mahimutang sa Mabolo. Apan ang klarong estorya gumikan kay ang tag-iya sa Vic Enterprises didto miamot alang sa kampaniya ni kanhi mayor Mike Rama niadtong mga milabay’ng eleksiyon.
Karon naay bag-ong gitukod nga Phoenix gasoline station sa Barangay Banilad duol anang Paradise Village. Ang tag-iya niana mao ang negosyanteng si Dennis Uy nga taga Davao City ug suod nga higala ni Presidente Rodrigo Duterte ug dakog amot sa campaign funds ni Digong niadtong 2016 presidential elections. Dugay na kanang nahuman apan wala dayon maka-operate kay wala ma-isyuhi og occupancy permit sa OBO.
Wala nay problema sa legal ug sa ubang mga permits. Ambot nganong gilangan sa OBO. Niadtong Sabado, gi-inagurahan ug nagsugod na pag-operate ang maong gasoline station. Niadtong Lunes pa na-isyuhan og occupancy permit. Apan wala pa matapos ang problema diha. Kay wala pa ma-isyuhi og business permit. Kay wala may business permit, intonsis, illegal ang operasyon niana. Aber, nganong dili man mapasirad-an sa taga City Hall?