TALK TO PAPA JOE Nagkauyonay

Dear Papa Joe,

Tagoa lang ko sa ngalan nga Joselito, 24 anyos na ang edad ug ulitawo sa pagka karon. Nagtrabaho ko isip factory worker sa Lapu-Lapu City.

Medyo bug-at ni akong problema kay mahitungod ni sa akong pagkatawo. Naa man gud koy bestfriend nga lalake kauban nako og shift unya permi mi manlaag uban sa among grupo sa motor since mga ulitawo man mi tanan. Pero naay usa ka adlaw ana nga kami rang duha nga gainom sa may Tamiya, Lapu-Lapu. Unya kay naabtan na man mi og gabii didto na lang mi niuli sa iyang boarding house. Gabawon pa gyud mi og beer. Ambot ba unsa panghitabua nga nagromansa na man hinuon mi pero naay pangutana pero murag nakauyon ra sad mi hangtud nga naay nahitabo namo.

Pagmata namo pagkabuntag, abi namo og lud-on mi sa among gibuhat, pero unsa bang kahimtanga nga nausban man hinuon ug mas intense pa ang nahitabo.

Mao ni akong suliran karon, galibug ko nganong nahitabo to. Bayot kaha ko? O siya maoy bayot? Karon suod gihapon mi ug sige sad mi og buhat ani, labi na human sa among ride unya adto ko matug sa iyang boarding house. Palihug tambagi ko.

JOSELITO

Joselito,

Ikaw ray makatubag anang imong pangutana kon bayot ba ka. Basin o basin og di sad pero nakauyon ka sa inyong gibuhat. Basin the feeling is mutual. Mas maayo mag-talk mo og tarong aside sa paglingaw lingaw lang, kon unsa gyud mo sa usag usa ug unsa gyud mo nga pagka tawo.

Kahibaw ko, daghan ang moisa nga kilay ani nga problema pero sa gikaingon ko na, kamo ra gyud nasayud tanan. Inyo nang pagbati, inyo nang kinabuhi. Ang ako lang inyong klaruhon para way masakitan.

PAPA JOE