As high as the heavens
Migawas lang sab dayon si Mama sa among kuwarto ni Sandra. Miyangu-yango si Sandra nako, timaan nga paatubangon ko kang Alex nga naghuwat nako sa among sala.
“Sige na, Te Sheena. Adtoa na siya.”
“Ikaw lay atubangan niya, Sandra. Di ko siya angay palaumon. You know gyud nga may uyab na ko.”
“Ay nimo, Te. Para pagpakig-estorya lang kang Kuya Alex di ka?”
“Sabta sab kog panagsa, Sandra. Kanunay maglaom si Alex nako kon atubangon ko siya kada pamisita niya nako?”
Nagyawyaw si Sandra nga migawas sa among kuwarto. Nakapanglingo na lang ko. Mihigda ko sa akong kama. Apan wa ko mahimutang. Diha sa akong hunahuna nga anugon ang gugma ni Alex nga wa nako dawata. Nasuta ko nga tinud-anay gyud ang iyang pagmahal nako. Di unta ko makonsumisyon kon si Alex pa ang akong boyfriend kay buotan man siya.
Apan wa gyud koy mahimo kay si Rommel man ang akong love.
Mibangon ko. Milingkod ko sa ngilit sa akong kama. Unya mitindog ko. Giablihan kog gamay ang pultahan sa among kuwarto ni Sandra. Duol ra sa sala ang maong kuwarto. Nakita ko si Sandra nga malipayon nga nakig-estorya kang Alex. Mao sab si Alex, malipayon sab.
Gitan-aw ko pag-ayo si Alex. Di sab bentahaan ang iyang hitsura. Gawas nga nindot og porma ang iyang lawas ug husto siya sa height, guwapo sab siya ug tabunon ang pamanit. Mipakibo na lang ko sa akong mga abaga nga misera pagbalik sa pultahan. Mihigda na sab ko sa kama. Hangtod nga nakatulog ko.
Nagmata na si Alex dihang nakamata ko.
“Ako lay unang maligo, Te.” Gisundan kog tan-aw ang akong igsuon nga misulod sa banyo. Dunay kaugalingong banyo ang among kuwarto. Unya mitingog ang akong selpon. Si Rommel ang nanawag.
“O, buntag pa man ron? Nanawag ka man?”
Nalipay kog dako sa pagkadungog sa tingog ni Rommel. First time pa kining nanawag siya nakog buntag.
“Unyang hapon pagkahuman sa atong klase, mananaw tag usab og sine, Sheen.”
Hilom kong nakapahiyom, nahigalam ang karaho. Nakaingon ko sa akong kaugalingon.
“Sige. Magteksanay lang ta unya.”
Pagkahuman namog estorya ni Rommel sa selpon, as high as the heavens ang gibati kong kalipay. (SUMPAYAN)