Ang gusto ni Kevin
Way maayong buot si Felomina pag-abot niya sa ilang balay ning sayong kahapunon. Hapit na siya atakiha sa kasingkasing pagbinadlong og pagkinastigo kang Kevin, 8 anyos niyang anak nga naa pa sa Grade 3. Hapit kada adlaw ipatawag siya sa maestra tungod sa kakingas ni Kevin nga way kabutangan. Bisag magsuod na ang klase magduwa gihapon siya. Ug manghilabot sa mga butang sa iyang klasmeyt, hangtod nga makakitag away.
“Unsa may hinungdan, Kevin, nga sa eskuylahan magpabadlong man ka? Dinhi’s ato di man lagi ka magpabadlong!” ni Felomina nga namahid sa singot sa iyang nawong sa pagkinabiba sa bag sa anak ug sa pagginuyod kang Kevin. Tunga sa kilometro ang gilay-on sa ilang balay gikan sa Amiraw Central School.
Nanglingkod sila sa pantawan sa ilang balay nga ginama sa kawayan, amakan ug nipa. Padayong namahid sa singot si Felomina. Ang iyang bana nga si Heracleo, diyanitor sa munisipyo. Alas singko pasado pa mahiuli. Wa magtingog si Kevin. Karong adlawa wa na lang niya kini kastigoa, kay lab-as pa ang mga lagom ug labhag sa miaging adlaw. Mokubol sab kuno ang utok sa bata kon sigehag kastigo. Bakos nga panit nga wa na gamita ni Heracleo ang ilatigo niya kang Kevin. Apan wala lang gihapon kini mabut-an.
May higala nga nakatambag kang Felomina nga pangutan-on lang ang bata, kay basig dunay gustong pangayuon bugti sa iyang pagbinuotan.
“Unsa may angay nakong buhaton, anak, aron magbinut-an ka na sa eskuylahan? Basig duna kay gustong pangayuon. Kon kaya namo, among ihatag nimo!’ ni Felomina.
“Unya na lang, Ma, inig abot ni Papa,” ni Kevin.
Gibatig kahibulong si Felomina. ‘Naa gyud diay bugti sa iyang pagbinut-an!’ tuaw ni Felomina sa hilom. Nahanduraw niya ang ilang kaagi ni Heracleo nga iyang kapuyo.
Teksmeyt sila kaniadto. Nagsabot nga magkita sa personal. ‘Love at first sight’ ang nahitabo. Diretso silag puyo sa balay ni Heracleo nga sinunod niini sa mitaliwan na niyang ginikanan. Way kasalkasal. Pagkahimugso ni Kevin nag-family planning sayon sila.
Pag-abot ni Heracleo miamen si Kevin. Migawas sa pantawan si Felomina. Gibiyaan ang iyang gidigamo sa kusina.
“Ika’y gihuwat ni Kevin aron isulti niya unsay iyang pangayuon bugti sa iyang pagbinut-an.”
“Dugay ka na mang nag- pabadlong, nganong wa man ka mosulti dayon nga duna diay ka’y gustong pangayuon?” ni Heracleo ngadtong Kevin.
Nagminghoy si Kevin, unya namulong, “Ma, Pa, uyab ra man mo no, kay wa man mo makasal?”
Pintok ang mga pulong sa bata nga mitan-aw sa iyang ginikanan nga nagbarog sa iyang atubangan. Nagpanglab-ok og laway ang magtiayon. Nagtinutokay sila nga daw natuk-an og kadiyot.
“Giunsa nimo pagkahibawo, Dong Kevin?” ni Heracleo nga nahibulong kay wa man kini nila mabutyag sa anak.
“Gawas nga ang akong apelyido dili parehas sa imoha, kay kang Mama man, wa moy litrato sa bungbong nga gikasal mo!” ni Kevin. “Nakasuroy ko sa mga balay sa akong mga klasmeyt, may mga litrato sa bungbong nga gikasal ilang mga ginikanan.”
Nangahilaw ang mga nawong nilang Heracleo ug Felomina. Nagtinan-away nga way tingog.
“Sa ato pa, gusto kang pakasal mi?” ni Heracleo.
“Oo, Pa. Mao nay akong gusto!” ni Kevin. Gikulbaan si Felomina.
“Imo mang Mama ang di gusto pakasal!” ni Heracleo nga subo ang nawong.
“Tinuod na, Ma?” ni Kevin nga kahilakon.
“Kon mao nay makapawa sa imong pagpabadlong, magpakasal mi!” ni Felomina.
“Yeheey! Ma-legitimate son na unya ko!” Mitindog si Kevin; naglukso-lukso sa kalipay.
Wa magdahom sila si Felomina ug Heracleo nga sensitibo diay ang bata sa iyang kahimtang. Nalipay sab hinuon sila nga ma-legal na ang ilang panag-ipon. (KATAPUSAN)