KNOCKOUT ANG TARGET
Aron kalikayan nga mabiktima sa hometown decision, ang pag-knockout sa ilang tagsa-tagsa ka mga kontra maoy anaa karon sa alimpatakan sa duha ka Mexicano kinsa makigsangka batok sa mga Ala Boys sa Pinoy Pride 45: Quest for Greatness nga ipahigayon sa IEC Convention Center sa Mabolo, dakbayan sa Sugbo.
Si Uriel Lopez, ug ingon man si Hugo Reyes sayod nga mag-atubang sila og dekalidad nga mga kaatbang apan bisan pa niini ilang gipadayag ang labaw nilang gikabalak-an mao nga di makiangayon nga desisyon.
Tungod niini, tuyo nila karon mao nga dili paabton sa mga kamot sa mga judges ang hukom sa away.
Pinaagi sa interpreter, si Lopez (13-6-1, 6KOs) mipadayag nga siya sayod sa kalantip, kusog ug kahanas ni WBO Oriental Super bantamweight champion Jeo “Santino” Santisima (16-2, 14KOs) hinungdan nga iya kining gipangandaman og maayo.
“I know that my opponent is a good and a tough fighter, but I want to prove that I can win this fight like what I did in Japan when I fought and beat former featherweight champion Ryo Matsumoto.”
“We are very prepared for this fight and we’re looking for a knockout win,” matod ni Lopez kinsa mihagpat og lima ka daog sa iyang unom ka uwahing mga away.
Sa dihang gikuhaan sa iyang habig, daw og sa nahagit si Santisima ug nagkanayon “kon knockout ang iyang gipangita, mao sab na akong gipangita, knockout sab. First time ni nako nga makaaway og Mexican, ug ako gyud himoon ang tanan.”
Si Michael Aldeguer, ang presidente sa ALA Boxing Gym, mibutyag nga importanti alang ni Santisima ang maong away sanglit mao kini ang maggiya kaniya alang sa mga dagko pang mga away.
Dinhi usab masukod kon andam na ba usab siya alang sa world title fight.
Sama kang Lopez, si Reyes, sa iyang bahin, nagtinguha usab og knockout nga kadaugan batok kang Kevin “KJ” Cataraja.
Iyang giingon nga dili niya usikan ang hataas niyang biyahe ug iyang tugbangan nga makauli sa ilang nasod nga dala ang titulo.
Si Lopez (9-1, 7KOs) ug Cataraja (8-0, 7KOs) mag-ilog sa WBO World Youth Super flyweight championships sa 10-round fight.
Sa sayo pa, giangkon ni Cataraja nga dili yanong kontra si Lopez nga may igong kusog usab.
Gituohan nga mokawat sa atensiyon sa kagabhion mao ang panag-abot ni Prince Albert Pagara (30-1, 21KOs) ug sa Ghanian fighter nga si George Krampan (14-3, 12KOs).
Ang kanhi Ghanian Featherweight king nga Krampan nakaaway na sa inilang si Isaac Dogboe alang sa bakanting WBO Africa featherweight title.
Sa maong promotion, mopakita usab og aksyon ang duha ka mga kanhi world challengers nga sila si Arthur Villanueva ug Jonas Sultan batok sa mga local counterparts.
Si Villanueva, ang two-time world challenger, mosuway sa katakos ni Carlo Demecillo samtang si Sultan giparang sa taga Malate nga si Ardin Diale.