3 MISUKOL SA PULIS, GIPATAY

MGA SUSPEK SA PAGPUSIL SA PULIS NGA NAG-OPERATION SA MANANGA

Napatay sa follow up operation sa mga sakop Provincial Intelligence Branch (PIB) inabagan sa Drug Enforcement Unit (DEU) sa Cebu Provincial Police Office ang tulo ka mga armado nga suspek sa pagpusil kang PO1 Jaylord Joseph Taping, kinsa nasamdan sa iyang walang dughan.

Sila si Taping ug mga kauban sa DEU sa Dakbayan sa Talisay naniid sa Mananga 2, Barangay Tabunok sa mao nga dakbayan Biyernes sa kaadlawon, Nobiyembre 23.

Apan kalit silang gipamusil sa armadong mga tawo, usa niini giila ni Taping nga si Arnel Hernani, alyas Alvin, kinsa usa sa mga napatay kagahapon sa alas 2:30 sa hapon sa San Jose Village, Barangay Lawaan 3.

Ang laing una nga nakalas giila nga silang Ramonito Manija, alyas Duterte, ug usa ka alyas Joseph.

Matod ni Police Regional Office (PRO) 7 Director Chief Supt. Debold Sinas, nakadawat og tawag gikan sa usa ka barangay official sa Lawaan 3 ang kapulisan nga ang mga suspek nagtago sa usa ka balay sa maong barangay.

Tungod niini, gisusi sa mga sakop sa PIB ug DEU ang dapit.

Apan wa pa gani sila makaabot sa balay nga gitug-an sa opisyal, gipamusil na sila sa maong mga lalake human usa sa mga spotter nakapahibawo sa pag-abot sa mga pulis.

Ang balay giingong gihimong hideout sa mga suspek panahon nga adunay silay mahimong krimen.

“Karong hapon lang, among gipakita ni PO1 Taping ang pictures atong mga namatay. Iyang gi confirm nga usa ato si Arnel Hernani, alyas Alvin, mao to ang nagpusil sa iyaha,” butyag ni Sinas sa mga tigbalita.

Dugang ni Sinas nga ang mga napatay sa PIB mao usab ang ningbahad sa mga pulis sa Siyudad sa Talisay nga mamusil kon mosulod sila sa sitio Kawatan, Mananga 2, Barangay Tabunok nga iyang gihulagway nga mga tigas.

‘TIGKAWAT’ OG MOTOR

Sa back ground investigation, ilang nasayran nga si Hernani nalambigit sa mga kaso sa pagpangawat og motor.

Daku ang posibilidad nga kauban siya sa duha nga napalgang patay sa Kampo 8, Toledo City niadtong Oktubre 25 sa buntag.

Matod ni Sr. Superintendent Manuel Abrugena nga ilang susihon kon wa bay kalambigitan si Hernani sa pagpatay kanila ni Joniel Abatayo ug Abelardo Salomag.

“Ang alam namin involve itong si alyas Alvin sa motornapping sa Talisay. So, may posibility nga kasama nya yung namatay duon sa Kampo 8,” matod ni Abrugena.

Kagahapon sa hapon, gitaoran og Medalya ng Sugatang Magiting nila ni Sinas si Taping sulod sa usa ka pribadong tambalanan.

LUWAS NA

Si Supt. Marlu Conag, hepe sa kapulisan sa dakbayan sa Talisay, nipahibawo nga luwas na sa makuyaw nga kahimtang si Taping bisan naigo sa wala nga dughan.

Sumala pa ni Conag, ang iyang mga sakop nagpahigayon og surveillance sa lugar dihang gipamusil.

Ang iyang mga sakop nakabawos hinungdan nga nilanat og 15 minutos ang pinusilay, apan nakasibat ang mga suspek.

Atol sa sinukliay sa mga bala kalit sab nga nahanaw ang mga suspetsado.

Samtang si Taping nakapamati nga nibanhod iyang dughan ug sa pagsusi naigo na siya.

Dali siyang gidala sa iyang mga kauban sa Talisay City District Hospital. /