20 KA PULIS SAKPAN NAGDUWA, NATULOG

Naaktohan sa hepe sa Cebu City Police Office ang 20 ka mga pulis sa lima ka police station sa syudad sa Sugbo nga nagduwag Game of Thrones ug billiards sa ilang cellular phone samtang ang uban nangatulog ug wa sa husto nga uniporme.

Mga pulis nga naatlan sa kinalit nga inspeksyon ni Sr. Superintendent Royina Garma nahisakop sa Guadalupe Police station, Carbon, Parian, Abellana ug Mabolo.

Adunay mga pulis nga gidayeg si Garma human iyang nakita nga nagkugi kini sa iyang trabaho ug alerto kanunay kon adunay tawag sa telepono.

Apan kadtong naabtan niya nga natulog samtang nag duty, imbestihahon.

“Maling bihis. Some are performing na walang sombrero, hindi naka tack properly yung uniform, marumi, yung iba natutulog talaga yung iba naglalaro ng cellular phones, billiards sa phone at nagbabasa sa news papers” matod ni Sr. Supt. Royina Garma.

Tungod niini, gipadalhan niya kinig kamandoan niadtong Martes, Nobiyembre 20, nga modusog pagpasabot nganong natulog sila ug nganong naabtan nga nag duwa sa ilang cellular phone.

Dul-an na usab sa 10 kanila ang iyang gi rekomendar nga ipaubos sa pre charge examination ug lakip sa gipaubos sa imbestigasyon sa kasong neglect of duty ang lima ka mga hepe sa lima ka police station.

Ning bag-o lang, tulo ka pulis ang gi rekomendar ni Garma nga isuspenso human napakyas pagtambong sa inspeksyon sa Internal Affairs Service (IAS) 7.

Mas estrikto si Garma sa pagsusi sa iyang mga sakop kon nagtrabaho ba sanglit usa ni sa hinungdan nga niubos pag-ayo ang crime volume ning tuiga.