MENOR, UYAB, NAKUHAA'G P100-T SHABU

Dul-an P100,000 nga balor sa ilegal nga drugas nga sud sa 200 ka mga gagmayng pakete ug duha ka dagkung bulto sa shabu ang nasakmit sa kapulisan sa Centro Police Station sa dakbayan sa Mandaue gikan sa managuyab, diin ang babaye usa ka menor de edad.

Ang duha kauban sa laing 11 pa ka mga tawo ang nasikop atol sa gihimong checkpoint operation gikan sa kagahapon, Nobiyembre 23, pasado alas 12:00 hangtud alas 2:00 sa kaadlawon sa samang adlaw.

Nakahilak nga nisaysay 15 anyos nga batang babaye pagpadayag sa iyang pagmahay kon nganong’ nakig-relasyon sa usa ka 30 anyos nga mamaligyaay og gidiling drugas.

Matud ni ‘Nena’ (di tinuod niini nga pangalan), magusa pa lang sila ka bulan nga manag-uyab ni Carlito Jamili, 30, taga barangay Inayawan sa dakbayan sa Sugbo.

Iyang gitug-an nga buotan kini kaniya, nagtabang diha sa gastuhan sa tambal sa iyang inahan ug ilabi na sa iyang pagtungha.

Giangkon hinuon usab niya nga manggamitay na sya og shabu sud na sa dul-an usa ka tuig tungod sa barkada.

“Grabe akong pagmahay, tagaan lang ko og chance nga makalingkawas ani nga kaso, di na gyud ko mousab, promise,” naghilak nga asoy sa batan-on sa Superbalita Cebu.

Samtang, si Jamili ang wa ra nagmahay nga silang duha ang nasikop sa Centro Police Station atol sa checkpoint sa dan A. Soriano sa Mandaue.

Apan, matud niya, igo lang siya nga nasuguan nga maghatud sa shabu ngadto sa Inayawan ug sa Mandaue.

Iyang giangkon nga walo na kadto nga higayon sa pagdala sa druga nga gikan sa iyang amigo nga taga Barangay Tangke, dakbayan sa Talisay.

Nakuha gikan kang Nena ang mga drug paraphernalia, samtang ang mga pinakete sa shabu nakuha sa posisyon ni Jamili.

Matud ni Police Chief Insp. Aldrin Villacampa ang hepe nga niangkon ang duha nga gikan sa Tangke sa Talisay.

Matud ni Villacampa, nasita nila ang duha human nga way helmet ang menor de edad nga nag-backride.

Laing 11 pa ka mga lalaki ang nasikop lulan og mga motorsiklo ang nasikop sa kapulisan human makuhaan og shabu ug marijuana.

Samtang, unom usab ka mga motorsiklo ang nadugang sa mga nasakmit nga motorsiklo sa Centro police station hinungdan nga niabot na kini karon sa kapin 200 ka mga motor nga na-impound diha sa gawas nga bahin sa ilang estasyon.