Ebidensiyang shabu lisod ma-recycle: pulis

Kon atong basehan ang proseso kon unsaon pagtago ug pagprotehir ang mga binultong shabu nga nangasakmit atol sa anti-drug operations, makaingon ta nga lisod gyud tuohan nga kini ma-recycle pa. Ang Section 21.3 nag-ingon nga ang sertipikasyon sa resulta sa laboratory examination, ipagawas gilayon sulod sa 24 oras gikan sa pagdawat sa shabu nga magsilbi unyang ebedensiya sa pagpasaka og kaso batok sa mga akusado.

Ang information officer sa Philippine Drug Enforcement Agency (PDEA) 7 nga si Leia Albiar mibutyag nga ang mga ebedensiya nga nasakmit sa mga operations ikustodiya ubos sa buhatan sa PDEA Laboratory.

Ang korte, human mapasaka ang kasong kriminal, mopahigayon og ocular inspection sa mga ebendensiya sulod sa 72 ka oras ug uban sa PDEA mao nay moguba o mosunog sa mga ebendensiya sa di pa mapupos ang 24 oras.

Si Supt. Dexter Calacar sa Lapu-Lapu City Police Office, mipadayag nga adunay mga marking ang mga ebedensiya atol sa inventory ug makuwestiyon ang attesting officer sa huwes kon dunay mga kadudahan o inusab sa mga gipresentar sa ebedensiya. Sa gikaingon na nato sa unahan, kon sundon gyud ang proseso.

Pero dili usab nato masalikway ang mga pagduda nga dunay kabahin sa mga nangasakmit nga shabu atol sa ronda nga posibling dili isumiter isip ebedensiya.

Dinhing dapita posibling moduwa ang mga badlungon nga mga tinugyanan sa balaod ug dinhi usab mogimaw ang katahap sa recycling sa mga nasakmit nga shabu.

Sa niaging Septiyembre, mismo si Police Regional Office 7 Director Debold Sinas mibutyag nga walo ka mga pulis sa Talisay City ang nangawat og mga shabu nga ebedensiya sa korte.