Panginabuhi para sa Pasko
Daghan ang nangita og puwesto. Daghang nagpaabang og puwesto. Paspas ang pagawas og puhonan. Daghang produkto ang gi-ugmad.
Supplier sa nagkadaiyang baligyaonon diin naglabi ang pagkaon, nigimok. Mao ni ang naandan kong ginagmay og dinagko nga panginabuhi ang hisgutan samtang nagkaduol na ang Pasko. Ayaw kahibung nga mamungingi ang halos tanang suok sa mga paninda kay kining panahona giisip nga haum alang sa mga makamaong magnegosyo bisan sa ginagmayay nga paagi. Ang nakanindot dinhi sa ato kay di lang Pasko ang gipangandaman. lahos lahos na ni padung sa Sinulog.
Tuig 2007 nakuyog ko sa grupo sa mga tawo nga gitahasan sa gitawag nga revitalization project sa Cebu City Hall alang sa dalan Colon. Didto akong nadungog ang diskusyon alang sa tinuig nga gimbuhaton. Sama sa naandan ang pagpanindot sa maong karsada gituki.
Ambot og nakasulagma ko sa sugyot nga di lang kutob sa pagpanindot ang ipatuman. Kusganon nakong giduso ang penobring rekomendasyon nga mao ang pag-abli sa labing unang higayon sa proyekto nga gitawag og Colon night market.
Sa sinugdanan sa estorya dunay pagduha-duha nga nitumaw kay lage makahasol sa bul-og sa trapiko sa downtown area. Apan sa paglabay sa pipila ka adlaw ila kong gipahibalo nga gisagop sa city hall ang akong sugyot.
Tuod man pagka Disyembre 1, 2007 pormal nga gibuksan ang labing una nga Colon night market. Nagbaha ang mga manindahay ug nagdasok ang mamalitay. Gikan sa mga borloloy, sapatos, senina, karsones, ukay ukay, pagkaon, mga gamit sa kusina, ug bisan unsa nalang gipanghagad ngadto sa mga kustomer. Gikan sa maong tuig hangtod karon ang pulong nga night market nahimong kabahin sa kalibutan sa ginagmayng patigayon.
Mao ni ang sugilanon sa pagpakabuhi sa minatarong nga paagi taliwala sa daghang pagsulay.
Sa niaging semana nisakay ko og jeep nga biyahe para Bulacao. Nitunol ko og 7 pesos ngadto sa konduktor. Sensiyo nga tibuok 5 pesos ug duha ka peso. Apan ang konduktor nibalik og tunol nako sa usa ka sensiyo dayong ingon nga subra akong giplete kay tibuok 10 ang sensiyo nga sa akong pagtoo piso.
Ang konduktor mao si Timtim Paran. Matod niya ang hiyas sa pagka matinud-anon maoy gimatutu sa iyang ginikanan ug akong gidayeg ang iyang gihimo. Ako siyang giingnan ipadayon ang pagsagop sa birtud sa pagka matinud-anon.
Bisan kong bag-o lang napupus ang imong kontrata isip contractual employee sa usa ka mall mao nga nagkundoktor lang una siya. Basin naa moy mapasudlan og trabaho ni Timtim diha ato siyang tabangan.