As high as the heavens
Ambot ba sab, uy. Mora mag naghinam-hinam ko nga ikauban na sab si Rommel sa sulod sa sinehan. Na, kon mahigalam ko sa iyang gibuhat nako, basig di mi makahumag eskuwela?
Apan nagpasulabi gyud ang akong kagustohan nga magkakuyog mi si Rommel sa pagpanan-aw og sine.
Human sa among klase anang pagka hapon, nagkita mi si Rommel sa gikasabotan namong fast food. Nag-esnak una mi ug pagkahuman nanulod na mi sa usa ka sinehan sa downtown. Sus, mao pa gani ang among paglingkod sa balcony, gigakos ug gihagkan dayon ko ni Rommel. Mibawos sab kog gakos ug hawok niya sa lips.
Gikusi ko siya sa kilid kay lihokan kaayo ang iyang kamot sa bisan asang parte sa akong lawas. Makalit-ad ko usahay ug mapaak ko siya sa iyang bukton. “R-Rom!”
Mora kog nagsalimuang. “Di ta dinhi, Sheena. Adto ta sa lugar nga kita rang duha.”
Gihagkan ni Rommel ang punoan sa akong dunggan. Ug wa na gyud ko makabalibad sa iyang gusto. Ug sa usa ka aircon nga kuwarto sa motel sa north reclamation area, nahatag ko kang Rommel ang akong lawas. Nakahilak ko pagkahuman. Gihapuhap ni Rommel ang akong buhok samtang iya kong gipasandig sa iyang dughan. Nagsandig si Rommel sa headboard sa kama.
“Ayaw ko pasagdi, ha,Rom?” “Di lagi, Sheen.” Kapoy ang akong lawas pagabot ko sa among balay. Gabii na kaayo niadtong tungora. Nakasulod ko sa among balay kay giteksan ko si Sandra nga ablihan ko niya.
“Naunsa ka na man, Te Sheena, nga wa ka may kontrol sa imong gibati kang Kuya Rommel? Diin man mo gikan nga kagabii na aron?”
Nagkusmod si Sandra samtang diha na mi sa sulod sa among kuwarto. Nakita tingali niya nga malipayon kaayo ko.
“Kuan, Sandra, nagsuruysuroy lang mi si Rommel.”
Nag-ilis ko og sinina nga para sa balay.
“Suruy-suroy lang kaha? Sus, Te, basig magbasol ka anang pagpakigsuod gyud nimo sa imong boyfriend? Ikaw lang.”
“Di ko magbasol, Sandra, kay nagminahalay mi si Rommel. Sure ko nga tinud-anay ang iyang feeling nako.”
Wa na motubag si Sandra nako apan nagyawyaw siya. Samtang naghigda ko, morag nabatyagan ko pa ang kainit sa hubong lawas ni Rommel.
(SUMPAYAN)