INTER-COLLEGIATE SA MINGLA, DEC. 1
Sa unang higayon, ang lungsod sa Minglanilla, Cebu mopahigayon og Mayor’s Cup Inter-collegiate Christmas league basketball championships nga gikatakdang sugdan karong Disyembre 1 diha sa Minglanilla Sports Complex. Lima ka mga collegiate
teams sa Sugbo ang mosalmot sa maong kompetisyon nga adunay kinatibuk-ang ganting salapi nga P200,000 alang sa mga mananaog.
Si Concordio Mejias, ang municipal administrator, mibutyag nga ang kompetisyon gitumong aron sa dugang pagpalambo sa ilang programa kalabot sa sports sa maong lungsod ug ingon man paghatag og kahigayonan sa mga molupyo sa Minglanilla nga makakita og dekalidad nga collegiate basketball tournament.
Ang maong lungsod nakaumol na og pipila ka mga basketball players nga nakahimo og pangalan sa mga dagkong lega sama nila Brian Heruela, kasamtangan sakop sa sa San Miguel Beer sa PBA ug Patrick Cabahug sa Cebu City Sharks, Mark Ababon sa Basilan Steel sa Maharlika Pilipinas Basketball League (MPBL).
Gipaabot nga mosalmot sa usa ka semanang kompetisyon mao ang Cesafi three-time champion University of the Visayas (UV) Green Lancers, runner-up University of San Jose Recoletos (USJ-R) Jaguars, University of Cebu (UC) Aguilas, University of Southern Philippines Foundation (USPF) Panthers ug Southwestern University-Phinma Cobras.
Ang makampiyon makadawat og ganting salapi nga P100,000 samtang ang runner-up makabulsa og P50,000. Ang third ug fourth placers adunay P30,000 ug P20,000. Subay niini, ipahigayon ang coaches ug team representatives meeting karong udto sa Sunburst Fried Chicken sa Mango Square, dakbayan sa Sugbo.
Kini aron hisgutan ang mga lagda sa torneyo.