Broner nanganti; plano ni Pacquiao pakgangon

Dili tungod sa kuwarta kon dili ang pagguba sa mga plano ni boxing superstar Manny Pacquiao maoy nakapadasig ni Adrien Broner sa ilang gikatakdang 12-round fight sa MGM Grand Garden Arena karong Enero 19 sa Las Vegas, Nevada.

Kini maoy mensahe ni Broner nga iyang gipaabot ngadto sa mga tigbalita isip tubag sa mga pangagpas nga siya maoy himuon ni Pacquiao nga agianan sa pagpakig-rematch niini ni Floyd Mayweather Jr.

“Screw the money,” matod ni Broner kinsa gitawag og “The Problem.” “I’m going to mess the plans up.”

Si Broner giingon nga adunay lima ka away nga mokantidad

og $50 million nga kontrata ni Al Haymon ug sa ato pa mobalor og $10 million sa matag fight.

Ang pinakadako nga nakita ni Broner sa iyang pamoksing mao ang $1.5 million batok ni Paul Malignaggi niadtong 2013 ug aduna usab siyay tulo ka away nga mikita siya og tag $1 million.

Layo ra kaayo kini sa $10 million nga iyang kitaon sa sunod niyang pagsaka og balik ibabaw sa ring.

Sa press conference, si Broner mibuhi og mga mahait nga pulong batok ni Pacquiao ug gilabtikan usab niya ang paghibalik ni boxing trainer Freddie Roach sa kampo sa Filipino boxing icon.

Ang match maker sa Las Vegas nga si Sean Gibbons mipadayag usab nga dili sayon alang ni Pacquiao ang pagpakigsangka ni Broner.

“He knows how to fight and Sen. Manny can’t take him lightly,” matod ni Gibbons.