SANTINO: DUNA GYUY MATUMBA
Humana ang mga tagawtaw, panahon na aron tumanon ang mga bahad sa mga protagonista sa Pinoy Pride 45: Quest for Greatness boxing promotion nga ipahigayon karong gabii sa IEC Convention Center sa Mabolo, dakbayan sa Sugbo.
Si ALA fighter Jeo “Santino” Santisima, kinsa modepensa sa iyang World Boxing Organization (WBO) super bantamweight title sa main event sa promosyon, tatawng determinado nga protektahan ang iyang titulo batok kang Mexican Uriel Lopez.
“Kon nangita siya og knockout, mao sab na akong gipangita. Naa gyu’y chance nga usa namo ang ma-knockout,” matod ni Santisima, kinsa adunay 16-2, 14KOs nga rekord.
Sa official weigh-in kagahapon sa SM City Cebu, si Santisima mitimbang og insakto 122 pounds samtang si Lopez, kinsa adunay 13-6-1, 13KOs nga rekord, mitimbang og 121 pounds.
“Maayo man sab siya moaway, dili lang gyud ko mokompiyansa,” dugang ni Santisima.
Ang stablemate ni Santisima nga si Kevin Jake Cataraja (8-0, 7KOs) mipadayag nga andam siya bisan unsa’y ipakitang away sa iyang kontra nga usa sab ka Mexican nga si Hugo Reyes (9-1, 7KOs).
“Gipangandaman gyud nako ning awaya. Kahibalo ko slugger siya, gusto siyang modaog og knockout pero ready ko. Kon ready siya, times two ang akong pagka-ready,” matod ni Cataraja.
Si Cataraja mitimbang og 114 ¼ pounds samtang si Reyes mitali og 115 pounds.
Ilugan nila ni Cataraja ug Reyes ang bakanteng WBO World Youth Super flyweight title.
Gilaumang mokawat og dakong atensyon sa promosyon ang away nila ni ALA fighter Prince Albert Pagara (30-1, 21KOs) ug Ghanian fighter nga si George Krampan (14-3, 12KOs).
Depensaan ni Pagara ang iyang WBO Inter-Continental super bantamweight title ning awaya.
Gikaintapang sab ang tagsatagsa ka tahas sa laing ALA fighjters nga sila si Arthur Villanueva ug Jonas Sultan, nga pulos kanhi world title contenders.
Si Villanueva, two-time world challenger, mosuway sa katakos ni Carlo Demecillo samtang si Sultan makig-away kang Ardin Diale.
Mokompleto sa mga parisan mao ang tali nila ni Japanese Go Hosaka batok Jason Tinampay, Lorenz Ladrada batok Audie Dacua ug Regie Suganob batok Mark Torella.