■P2 MILLION.

Sila si Jovanie Rabago Cabrillos (naglingkod), 28, taga Sitio Crusher, Brgy. Lawaan 3 ug kapuyo nga si Shera Mae Gabito Abatayo (gatindog), 27, taga Sitio Ilang-Ilang, Brgy. Lagtang, nasikop sa buy bust operation sa kapulisan kagahapon sa buntag, Nobiyembre 24, sa Sityo San Miguel, Barangay Linao, Dakbayan sa Talisay.

Kanhi basurero, uban sa iyang kapuyo, nakuhaan og kapin sa P2 milyones nga balor sa drugas atol sa buy bust operation kagahapon, Nobiyembre 24, sa alas 6:45 sa buntag sa Sitio San Miguel, Brgy. Linao, Dakbayan sa Talisay.

Napusasan si Jovanie Rabago Cabrillos, 28, taga Sitio Crusher, Brgy. Lawaan 3, uban sa iyang kapuyo nga si Shera Mae Gabito Abatayo, 27, taga Sitio Ilang-Ilang, Brgy. Lagtang

Ang duha nasikop sa buy bust nila ni Sr. Insp. Alejandro Batobalonos, hepe sa Provincial Drugs Enforcement Units, (PDEU) sa Cebu Police Provincial Office (CPPO), ug mga sakop sa Provincial Intelligence Branch (PIB) CPPO.

Si Batobalonos nga nahinabi sa Superbalita Cebu nibutyag nga kapin sa duha ka simana nilang gi-monitor ang manag-live-in.

Nipalit sila og shabu balor og P60,000 ug dihang ni-transact na, daling nilang gipusasan sud sa giabangang balay niini sa Brgy. Linao.

Matod ni Batobalonos, nakuha nila tanan gikan nila ni Abatayo ug Cabrillos ang pito ka mga dagkong bulto sa shabu nga motimbang sa 175 gramos nga mobalor og P2,065,000 sa Dangerous Drugs Board (DDB) value.

Nakuha usab ang buy bust money, cash nga P4,950, usa ka digital nga timbangan, ug mga gamit sa pagsuyop og illegal drugs.

Matod ni Batobalonos, dinagko ang trasaction sa managti-ayon apan wa motug-an kinsay ilang supplier.

Sa imbestigasyon, nigawas nga laing tawo maoy mohagbong og drugas.

Ang tag-iya sa apartment nga nahinabi sa Superbalita Cebu nitug-an nga bayot ang niabang sa apartment nga tag P3,500 ang buwan niadtong Oktubre 23, 2018, apan niadto lang Nobiembre 5 gipuy-an sa mga dinakpan.

Si Abatayo kanhi basurero sa barangay samtang ang iyang kapuyo niabag sa negusyong traysikol sa ilang ginikanan.

Nanghimakak si Abatayo nga may labot siya sa ilegal nga negusyo.

ONE TIME BIG TIME

Moabot sa P1.7 million ang nasakmit sa kapulisan sa syudad sa Sugbo sa ilang dungan nga One Time Big Time operation batok sa illegal nga drugas sud sa 24 oras gikan Nobiyembre 22 ngadto sa 23 sa alas 8 sa gabii.

Nakasikop usab og 30 usab ka drug personalities sa 23 ka buy bust operations ang kapulisan.

Siyam niini nadakpan pinasikad sa warrant of arrest ug usa sa search warrant nga giluwatan sa korte.

Matod ni Sr. Supt. Royina Garma, hepe sa Cebu City Police Office, nga bisan sa ilang bag-o lang nga gihimong dungan nga anti drug operations sa Police Regional Office 7, aduna na usab silay namonitor nga namalik sa pagpamaligya.

Nakatutok lang sila sa duha ka mga barangay sa syudad sa Sugbo nga naghitak ang illegal nga drugas nga mao ang Calamba ug Labangon.

Dugang niya nga resulta kini sa ilang sunod-sunod nga mga dakop diin ang mga dinakpan motug-an kinsa ang ilang supplier ug asa sila mag kuhaan sa illegal nga drugas. /