LAING 3 NAPATAY SA PULIS

SA ANTI DRUG OPERATIONS SA TALISAY POLICE SA BARANGAY MAGHAWAY

Tulo ang patay sa gipahigayong buy bust operation sa Brgy. Maghaway, dakbayan sa Talisay kagahapon Sabado, Nobiyembre 24.

Ang mga suspek giingon nga ningsukol sa kapulisan hinungdan nga nabawsan kini ug napatay.

Naila ang mga patay nga sila si Susano Labrador, Vincent Ceballos, ug Warlito Tecson.

Ang ilang lider nga si Ariel Olivar, alyas Ladoy, nakaikyas, uban kang Jackson Segundino, kinsa gitumbok nga hitman.

Ang operasyon gipahigayon kagahapon sa alas 3:05 sa hapon diin pinangulohan kini sa Talisay City Police, Regional Special Operations Group (RSOG) 7, Provincial Public Safety Company (PPSC) 7, ug Regional Public Safety Batallion (RMFB) 7.

Atol sa buy bust operation, nakamatikod ang mga suspek nga ang katransaksyon nila pulis, kalit kining nipabuto sa pulis hinungdan sa nahitabong pinusilay.

Patay ang tulo samtang si Olivar nga main subject sa buy

bust, nakaikyas.

Sa pagsuwat ning taho, wa pa masayri kinsa ang nitunol sa drugas ug kinsa sa tulo ang nakapabuto.

Upat ka mga armas ang ang nasakmit gikan sa operasyon.

Sa pagkutlo ning balita, padayon pa nga gi-inventory ang nasakmit nga drugas. Padayon usab ang hot pursuit operation batok sa mga suspek nga nakaikyas.

BACKGROUND

Matod ni Supt. Marlu Conag, Talisay City police chief, nga ang mga suspek bag-o lang nailhan nga naa sa top 2 suppliers sa illegal drugs sa Talisay.

Nalambigit usab sila sa nagkadaiyang mga krimen.

Si Labrador gilambigit sa duha ka mga kasong murder, usa niini pagpatay sa usa ka barangay konsehal sa siyudad.

Siya ang gitumbok nga naghupot sa ilegal nga sugal sa Barangay Maghaway ug gikahadlukan kaayo sa dapit.

Si Ceballos gikatahong maoy tighatod sa illegal drugs ug manghulga usab sa mga taga barangay.

Laing tigbaligya mao si Tecson, kinsa giingong gireklamo usab sa iyang pamilya nga hulga sa ilang seguridad.

Si Oliva ang amo sa usa ka Cheryl, kinsa nadakpan sa miaging buwan sa kapulisan ug nakuhaan og P10 million nga illegal drugs.

Uban kang Labrador, sila ang nanguha og mga hitman aron mopatay unta og mga pulis sa Talisay City.

Laing wa usab madakpi pa mao si Jackson Segundino, kinsa usa gihapon ka hitman, nagkanayon si Conag.

Si Segundino dunay duha ka mga warrant of arrest sa kasong murder. Ang kamatayon sa tulo nahitabo wa pay 24 oras sa pagkamatay laing tulo ka mga tawo sa Barangay Lawaan 3 sa mao nga siyudad.

Ang tulo nga napatay gitumbok nga maoy namusil sa mga pulis sa mao nga siyudad nga nakaangol og usa. /