Laing bonus ihatag sa Kapitolyo sa Disyembre

Di mosobra sa P25,000 madawat nga collective negotiation agreement (CNA) bonus sa mga akwani sa Kapitolyo karong Disyembre.

Giklaro sa Provincial Budget Office nga ma-depende hinuon sa savings sa Provincial Government ang madawat nga bonus sa mga regular ug kaswal nga empleyado.

Samtang, inay nga kwarta, usa ka sakong bugas ang madawat sa mga job-order employee.

Human nadawat sa mga kawani sa gobiyerno, lakip na sa mga taga-Kapitolyo, ang ilang year-end bonus ug cash gift niadtong Nobiyembre 15, may mapaabot na usab nga bonus ang mga regular ug kaswal nga empleyado sa Provincial Government.

Matod ni Provincial Budget Officer Danilo Rodas, niluwat na og guidelines ang Department of Budget and Management (DBM) alang sa pagpanghatag sa CNA bonus sa Disyembre.

Base sa guidelines, kinahanglang di mosobra sa P25,000 ang madawat sa matag regular ug kaswal nga kawani sa gobiyerno.

Giklaro hinuon ni Rodas, nga di sab kinahanglang moabot a maong kantidad ang CNA bonus nga ihatag sanglit ipahaom kini sa savings sa lokal nga kagamhanan.

“Pananglitan naa ta’y savings nga P15 million, i-divide sa number sa mga empleyado. Ang mogawas mao na ang atong per employee nga savings. If savings nimo P30 thousand (matag empleyado, P25 (thousand) ra gyud (ang ihatag),” pasabot ni Rodas,

Dunay sa 1,600 mga kaswal ug regular nga empleyado ang Kapitolyo.

Moabot sab sa 1,500 ang mga job-order employee niini.