Maayong paghipos sa mga basura target sa mosunod nga 10 ka tuig

Giaprobahan sa National Solid Waste Management Commission sa miaging buwan ang 10 ka tuig nga Solid Waste Management Plan sa kagamhanan sa lalawigan sa Sugbo nga magsugod karong tuiga hangtod sa 2027.

Apil sa 10 ka tuig nga plano sa SWM sa lalawigan ang pagtukod og material recovery facilities (MRF) sa kabarangayan ug mga siyudad, composting sa malata nga mga basura aron magamit isip organic fertilizers, pag-recycle sa mga basura nga dili malata, paglahi sa malata ug dili malata ug paghimo og sanitary landfill.

Matod ni Jason Lozano, pangu sa Provincial Environment and Natural Resources Office (Penro), nga ang plano magsilbi nga gabay sa kabarangayan, kalungsuran ug siyudad sa lalawigan sa Sugbo aron mapaminosan ang epekto sa pagpasagad og labay sa basura nga usa sa mga hinungdan sa pagbaha.

Si Gobernador Hilario Davide III unang namulong nga ang barangay isip maoy frontliner sa kagamhanan, kinahanglan mohimo og ecological solid waste management program ug pahingusgan ang paglahi sa mga basura gikan sa malata ug di malata.

Siya niawhag sa lainlaing local government units sa lalawigan nga mopatuman og eskedyul sa pagkolekta sa mga basura ug magbutang og MRF sa matag barangay.

Ang NSWMC mao ang ahensiya nga gitahasan sa gobiyerno sa nasod sa pagpatuman sa Republic Act 9003 kun Ecological Solid Waste Management Act sa 2000.

Gitahasan kini pag-institutionalize sa nasudnong programa kabahin sa pagdumala sa pagkontrolar, pagbalhin, pagbiyahe, pag-proseso ug paglabay sa mga basura sa nasod.

Sa website sa Cebu provincial government, masayran nga ang gobernador ang nangu sa pag-cluster sa 16 ka provincial ug district hospitals alang sa paghimo og MRF niadtong 2017 nga nagkantidad og P1.6 milyones. Sakop sa Cluster 1 ang mga provincial hospital sa mga siyudad sa Danao ug Bogo ug lungsod sa Balamban ingon man ang Ricardo Maningo Memorial Hospital sa isla sa Camotes, ug district hospitals sa Tuburan, Daanbantayan, ug Bantayan.