Sharon-Gabby movie wa nay purohan?
Ang tanan gahulat gihapon kon kanus-a o madayon pa ba ang reunion movie nilang Sharon Cuneta ug Gabby Concepcion.
Siguro ang uban gikapoy nag pinaabot samot pa nga may mga tsikang nanggawas nga dili na madayon ang proyekto.
May kamatuoran sab siguro kini kay kon inyo lang subayon, nakagama na og pelikula si Sharon kauban ang usa sa iyang mga leading man kaniadto nga si Robin Padilla.
Karon usab may balik-tambalan nga pelikula si Sharon kapartner ang usa sa iyang paboritong leading man nga si Richard Gomez.
Ipasalida na sa mga sinehan karong semanaha ang Sharon-Richard movie nga “Three Words to Forever.”
Mao nga unsa man gyud may purohan pa kaha nga maguban sa pelikula ang numero unong loveteam niadto nga Sharon-Gabby?
Pwes, kay wala pa may klaro, atong hisgotan kining bag-ong pelikula sa Star Cinema nga ubos sa direksyon ni Cathy Garcia-Molina. Makauban nila dinhi si Kathryn Bernardo nga sa unang higayon dili si Daniel Padilla ang kapareha kondi ang PBB housemate Tommy Esguerra.
Sa trailer, istorya sa pamilya ang tema niini, sa akong nakita morag may away o buwag na ba kaha ang mga ginikanan dinhi ni Kathryn, nga silang Sharon ug Richard.
Sa akong nasabtan sa trailer wala nila gipahibawo sa ilang anak kon unsa ang tinuod nga kahimtang sa relasyon sa magtiayon.
Sa pelikula nagplano ug nag-preparar na ang manag-uyab nga Kathryn ug Tommy, kon unsay dangatan niini mao nay atong makita sa pelikulang “Three Words to Forever”. Naa usab silang Freddie Webb, Liza Lorena ug Joross Gamboa.
Nihangyo diay ang dalaga nga sabton ug suportahan usab unta sa KathNiel fans ang maong movie “Three Words to Forever.” Ay’g saba!
May entry usab si Kim Chiu sa Metro Manila Film Festival ang “One Great Love” kay human sa 10 ka tuig balik-Regal ang byuti sa chinita princess.
Nakita nato ang dalaga niadtong 2008 sa usa ka episode sa “Shake Rattle & Roll” sa Regal films.
Sa “One Great Love,” si Kim giilogan nilang JC de Vera ug Dennis Trillo. Makauban nila dinhi silang Miles Ocampo, Niña Dolino, Marlo Mortel ug Eric Quizon nga mao usab ang direktor sa pelikula. Ay’g saba!