Suroy suroy

Kon dugay kang naundang og biseklita sama nako, ayaw pakaliti ang imong lawas. Hinayhinay lang og balik kay aron maka adjust ang imong lawas.

Nahinumdom ko sa akong labing unang long ride gikan sa amoa sa Bacayan padung sa Carcar City niadtong summer sa 2010 uban sa among kanhi photographer nga si Allan Defensor, maora ko og gibunalbunalan pagkagabii sa kasakit sa akong kalawasan. Ang pait kay wa ko makatulog hangtod sa lawom nang gabii. Kinsa bay makatulog sa kasakit sa kalawasan?

Wa ko motumar og pain killer kay naandan ra ni nga reaksyon sa muscles ug nerves. Nagkadugay, nawagtang ra ang mga sakit sa bagtak, paa, lubot ug mga bukton. Sukad ato, di na ko bation og sakit sa kalawasan kay ang akong lawas naka adjust na man. Di na sab ko maluya dayon og init bisan pag alas 12 o ala 1 sa hapon nga naa ko sa karsada.

Apan dihang naundang ko og kapin sa usa ka tuig kay nag mild anemia tungod sa akong insomnia, dali nang mosakit ang akong ulo samtang nagbuwad sa init bisan gikan lang ko sa Busay. Wa na man maanad ang akong system sa temperatura. Kay kon mosikad sab ko, sa bukid na man ko sa Talamban, diin daghan pa og mga kakahuyan nga mahimong makasalipod.

Di baya lalim ang biseklita bisan tuod mao ni ang labing maanindot nga recreational sports alang nako kay makasuroysuroy ra ka, makahimamat og mga higala and you visit and know places.

NASUHITO

Sa ilang early teen years, ako nang gianad og biseklita ang akong mga anak, libot sa Metro Cebu. Daghan sila og naduaw nga mga lugar nga suok kaayo. Bisan gani ako, wa masuhito sa interior nga mga lugar bisan natawo ko sa Bacayan.

Mao na nga kompyansa ko sa akong mga anak nga mosuroy nga makatultol ra sila kay bisan asa na gud sila nakaabot sa pagbiseklita. Karon nga nag scooter ko, bisan mga suok nga lugar ako rang adtuon nga di na ko mabalaka kay naagian na nako kaniadto.

Advantage ni sa tigbiseklita ang pagsuroysuroy, pagsuhito sa lugar. I bet, bisan natawo ka sa usa ka lugar, sure kong daghan ang wa nimo maadto. Sa mountain biking, daghan ko og naduaw nga mga lugar.

POSITIVE

Mao ra ni ang bisyo nga makaayo sa lawas. Maka burn og calories ug fats. Sumala pa sa usa ka asawa nga akong nadunggan “maayo na lang na kay biseklita na ang iyang bisyo. Sa una, mga babaye ang tugpahan sa iyang kwarta.” Nalipay ang asawa nga naa na pirme sa ilang balay ang iyang bana kon way sikad.

Nakapausab diay sa iyang bana ngadto sa kaayo ang biseklita. Human ini, ang iyang bana mointriga na sa tanang kwarta.