As high as the heavens
OLIVER PEPITO FLORES (Ikaunom sa pito ka mga gula)
Gisundan pa sa makadaghang higayon ang pagpanulod namo ni Rommel sa motel. Hangtod nga usa ka buntag ana, nakamata ko kay naglain ang akong kutu-kuto. Kasukaon ko. Nagdagan kong misulod sa banyo ug mitikuka gyud ko sa bowl. Luod kaayo ang akong paminaw sa akong tiyan. Sus, way nadala sa akong pagsuka gawas sa laway lamang. Giduut-duot ko ang akong kutu-kuto. “Naunsa ka, Te Sheena?” Giatubang ko si Sandra nga misunod diay nako. Nagtabisay ang akong singot sa nawong.
“Hala, Te, kaluspad nimo?”
“Mora man kog kakuyapon, Sandra. Nalipong ko.”
Giagak ko ni Sandra paggawas namo sa banyo. Iya kong gipasandig sa headboard sa akong kama. Gipahiran niyag tualya ang akong nawong ug lawas nga nabasa sa singot. Giilisan ko niyag tisirt. Unya iya kong gipahigda ug gihaplasag vicks ang akong tiyan labi na ang kutu-kuto. Medyo nawala na ang akong pagpanglipong.
“Pahuway una, Te, Tawgon ko sila si Mama ug Papa.”
Gikuptan ko ang kamot ni Sandra nga mobiya na unta nako. Gipugngan ko siya.
“Ayaw, Sandra. Ayaw una sila pahibaw-a. Gikulbaan ko ani.”
Mitan-aw og dugay si Sandra nako. Puwerte niyang seryusoha. Unya milingkod siya sa ngilit sa akong kama. “M-Mabdos ka, Te Sheena?” “Wa pa ko kaseguro, Sandra. Magpatsek-ap ko unya.”
“Na, kon buntis ka, unsaon na man lang kon di motubag ana si Kuya Rommel? Nakahibawo ka na bitaw nga daghan siyag gipamabdosan pero iyang gitalikdan ug gipasagdan?”
“Ambot ani, uy, Sandra. Kon mabdos gyud ko, pahibaw-on ko si Rommel.”
Napanglingo si Sandra nga mibiya nako. Nagbagutbot siya apan wa ko maklaro kon unsay iyang gisulti. Ang naklaro ko lang nga nasuko siya. Ambot kon kinsay iyang gikasuk-an, ako ba o si Rommel.
Niadtong adlawa, nahibaw -an nako ang tinuod kong sitwasyon. Nakahilak ko pagsulti na sa doktor nga naghiling nako. Mabdos gyud ko. Paggawas ko sa klinik, gitawgan dayon nako si Rommel. Wa dayon siya motubag. Nagsigeg kiring ang iyang selpon.
Nalipay ko dihang gitubag na ang akong tawag. Apan nasagmuyo ko kay tingog sa babaye ang mitubag nako.
“H-Hello! Kinsa ni? Si Rommel ang gusto kong ikaestorya.”
Morag di ko makaginhawa niadtong tungora. (TAPUSON SUNOD GULA)