Ang babaye sa karaang balay
Mahilig si Rodrigo sa mga karaang balay. Alang kaniya morag motidlom ngadto sa kinauyokan sa iyang kalag ang kalalim kon makakita siyag karaang balay. Sa nagtungha pa siya sa hayiskol ug sa paghimuntog niya sa kolehiyo diin Bachelor of Arts ang iyang gikuha nga kurso, naagian gyud niya ang sabdyek nga Literatura. Napakli ug nabasa niya ang nobela ni Nathaniel Hawthorne nga nag-ulohan og ‘The House of Seven Gables.’ Mokuba dayon ang iyang dughan ug ingon nga ibayaw siya sa langit kon mahinumdom sa dugokan sa nobela. Hasta ang sugilanon ni Edgar Allan Poe nga ‘The Fall of the House of Usher’ nahuman na pod niyag basa ug duna nay katagbawan ang iyang kalag nga daw mabusog siya. Ug ingon nga ang iyang tinan-awan diha na lamang motapot sa mga hulagway sa mga karaang balay.
Ug unya wala damhang napadpad siya sa mga dapit nga dunay daghang mga karaang balay nga natukod panahon pa sa mga Katsila. Pagka nindot lantawon gikan sa halayo ug ingon man sa duol, nga way kapuol ang iyang mga mata pagtan-aw. Gikuhaan niyag hulagway ang mga balay nga iyang naagian pinaagi sa iyang video camera.
Ning iyang pagsuroy-suroy, nahiabot siya sa usa ka mamingawng dapit diin may karaang balay. Nindot ang desinyo ug estilo. Nia siya sa usa ka karaang balay sa Puerto Candado. Human mananghid sa ‘caretaker’ misulod siya ug misaka sa hawanan. Didto may usa ka matahom nga babaye kansang pangalan mao si Catalina, apo sa tag-iya sa karaang balay. Mahilig kini og sayaw, mga sayaw sa karaang panahon. Kay makamao man siyang mosayaw, gisayawan niya ang dalaga. Ang awit nga gitugtog sa esteryo mao ang awit nga ‘Granada’ nga medyo may pagka kumpas apan nagdulot og katahom sulod sa karaang balay.
Ako si Rodrigo. Ug ikaw mao si Catalina. Mao kanay gisulti kanako sa tig-atiman ning balay,” ni Rodrigo nga hugot nga mikupot sa duha ka kamot sa dalaga dihang mituyok-tuyok na kini ug unya iya kining naggakos paghibalik sa kabug-at niini.
Unya namulong ang matahom nga dalaga, “Rodrigo, nalimot ka ba nga dinhi ka man gikan? Kining karaang balay mao ang atong kalibutan. Ayaw na akog biyai! Ayaw na intawon kog biyai!”
Kalit lang nahanaw si Catalina. Nahimatngonan ni Rodrigo nga siya ra diayng usa ang nagsayaw. Nag-inusara ra diay siya dinhi sa sulod sa karaang balay. Milanog ang iyang tingog nga nagtawag kang Catalina, “Catalinaaaaaaaa!”
(KATAPUSAN)