GIPANGAYO NIYA KANG STO. NIÑO
Sud sa 13 ka tuig, kanunay motambong si Candice Unique Sandiego-Acuña sa nobenaryo sa kapistahan ni Señor Sto. Niño matag Enero sa Basilica Minore del Sto. Niño sa siyudad sa Sugbo.
Apan dili niya makumpleto ang siyam ka adlaw nga nobenaryo sanglit mopauli kini sa ilang panimalay sa dakbayan sa Carcar matag Sabado ug Dominggo.
Niadtong 2009, nahuman niya ang siyam ka adlaw nga nobenaryo sa Milagrusong Bata.
“Every year mangayo gyud ko og son. I fervently prayed nga madungog akong gipangayo sa Señor Sto. Niño,” paambit ni Acuña.
Tuod, pagka Pebrero sa samang tuig, usa ka gasa ang iyang nadawat gikan sa kahitas-an.
Siya nagsabak sa usa ka batang lalake.
Apan dili sayon ang mga naagian ni Candice samtang wala pa manganak. Anam-anam og kaubos ang
amniotic fluid sa tagoangkan sa 43 anyos nga inahan. Kini nga fluid mao ang protective ug yellow liquid nga nipalibot sa masuso sa nagsabak nga inahan.
Gidid-an usab siya mobiyahe matag adlaw gikan sa dakbayan sa Carcar padung ngadto sa iyang kanhi gitrabahoan sa SunStar Cebu gumikan kay us-os ang iyang matris.
Apan pagwalo ka buwan sa iyang gisabak, nipauli siya sa ilang panimalay sa Carcar hinungdan nga human sa usa ka semana, nasayo og usa ka buwan ang iyang pagpanganak.
Dili sayon ang iyang paghimugso sa bata kay nilanat og duha ka adlaw ang iyang pag-labor.
Gisuwayan una sa iyang doktor nga siya paanakon pinaagi sa normal delivery apan wa kini mahitabo, hinungdan nga ang uwahi nihukom ug gi- paagi sa Caesarean section ang paggawas sa bata.
Alas 11:55 sa gabii sa Nobiyembre 7, 2009, natawo ang 5 libras nga batang lalake sa Cebu Doctors’ Hospital.
Ila kining ginganlan og Gabriel nga gikan sa pangan sa usa sa mga anghel sa Diyos. Atol sa pagpanganak ni Candice, kalit siya nakasiyagit sa kahadlok kay wala mohilak ang anak dihang nahimugso na si Gabriel.
Tungod kay kuwang og buwan, nahabilin ang bata sa ospital sud sa 10 ka adlaw.
Karon, usa ka himsog, ambungan ug buotan nga bata si Gabriel, kinsa nisaulog sa iyang ika-9 ka tuig nga birthday niadtong Nobiyembre 7, 2018 sa usa ka fast food restaurant sa Carcar.
Ang party gitambungan sa iyang classmates, ig-agaw ug mga higala.
“I wish he will grow to be a healthy boy ug makuha niya ang iyang mga gusto,” dugang ni Candice.