Andam na ko: Tabal

Usa na lang ka semana ug motiklop na ang pagpangandam ni Cebuana Olympian marathoner Mary Joy Tabal alang sa iyang pagdagan sa 42nd Milo Marathon National Finals nga gikatakda karong Disyembre 9 sa Laoag City.

Nagkanayon si Tabal nga kagahapon maoy katapusang higayon nga midagan siya og taas nga distansya sa iyang pagpangandam.

Sa naandan sa iyang training program, si Tabal modagan og 100 ngadto sa 150 ka mga kilometro sa kinatibuk-an sulod sa usa ka semana.

“I’m now 80 percent ready. I just wish to stay healthy and injury-free,” matod sa 29th Southeast Asian (Sea) Games gold medalist sa interbyu sa Sun.Star Cebu, igsuong buhatan ning mantalaan.

Ang 29 anyos nga marathoner wala lang nagtinguha og rekord nga six-peat sa Milo Marathon National Finals, gusto sab niining buakon ang rekord sa event nga siya ra sab ang naghupot.

Human sa iyang training kagahapon, si Tabal mideretso sa Liloan Central School sa lungsod sa Liloan, Cebu alang sa iyang matag buwan nga pakigkita sa iyang grassroots students.

“Once a month we are doing a monthly trial run to all our grassroots students from Brgy. Guba, Liloan and Sisters of Mary School-Boystown and Girlstown,” pasabot ni Tabal.

Nagkanayon si Tabal nga matag buwan, mopahigayon sila og mini-competition sa ilang mga estudyante sa grassroots.

Ang mopatigbabaw nga tulo sa boys ug girls division sa elementary ug high school makadawat og running shoes ug Milo jersey nga gikan sa mga donasyon.