DURANT, WARRIORS MITUSAK SA BLAZERS
Bangis nga ningbangon gikan sa upat ka sunodsunod nga kapildihan ang defending champion Golden State Warriors ug ilang gipahimungtan ang Portland Trail Blazers, 125-97, kagahapon sa National Basketball Association (NBA) sa Oracle Arena sa Oakland, California.
Nagkumboya ang duha ka mga sinaligan sa Warriors nga sila si Kevin Durant ug Klay Thompson aron pukawon ang pagkahinanok sa back-to-back
champions ug isaka ang rekord niini ngadto sa 13-7.
Si Durant, kinsa kanhi MVP, nagpakatap og 32 puntos aron pangulohan ang kadaugan samtang nidugang og 31 puntos si Thompson. “I don’t believe in like, it’s just going to be over when it’s over. In the NBA, I don’t believe in fairytales and the emotions that come into this,” matod ni Durant.
Kinahanglang mokayod og insakto ang Warriors gumikan kay padayon silang ningkombati nga wala ang ilang pambatong pointguard nga si Stephen Curry, kinsa nagpaalim pa sa iyang angol sa iyang tiil.
Gawas kang Curry, wala sab ang sinaligan sa Warriors sa depensa nga si Draymond Green, kinsa aduna sab angol sa iyang tiil.
Ang Blazers, nga nangatagak sa 12-7 nga baraha, gipangulohan ni Damian Lillard pinaagi sa iyang 23 puntos, niamot og 22 puntos si Jusuf Nurkic samtang nihatag og 19 puntos si CJ McCollum.
Sa laing giatangang kombati kagahapon, gipangbuntog sa host Los Angeles Lakers ang Utah Jazz, 90-83, aron irehistro ang ikapito nilang daog sulod sa walo ka mga duwa.
Ang Lakers mingsaka sa 11-7 nga rekord samtang ang Jazz nangatagak sa 8-11 nga baraha.
Gipangulohan ni Brandon Ingram ang Lakers pinaagi sa iyang 24 puntos samtang nidugang og 22 puntos ug 10 rebounds si four-time MVP LeBron James.
Ning kombati, daghang
turnovers nga namugna ang Lakers apan ilaha kining nabawi pinaagi sa ilang depensa.