Modernong PUV ilusad

Tan-awon una sa Cebu City Transportation Office (CCTO) kon dili ba makatampo sa kahuot sa dagan sa trapiko sa pipila ka kadalanan sa dakbayan sa Sugbo ang pasiunang 22 ka moderno nga public utility vehicles sa dili pa tugotang makabiyahe og sugod.

Matod ni Francisco Ouano, operations chief sa CCTO, mahinungdanon nga dunay koordinasyon tali sa lokal nga kagamhanan sa dakbayan sa Sugbo ug ang mo-operate sa bag-ong mga sakyanan aron matan-aw kon asa kini nila mahimo padaganon.

“Ang atong purpose nganong pahibaw-on ta diri kay aron ma-aware sad ta ba nga oi kana diha dapita di pwede paagian, ngari diri dapita pwede paagian,” pasabot ni Ouano dihang nahinabi sa Superbalita Cebu.

Dunay duha ka missionary nga mga rota nga unang giila nga subayon sa pasiunang 22 ka bag-ong mga PUV nga kabahin sa 40 ka mga sakyanan nga i-operate sa Persano Corporation isip kabahin sa PUV Modernization Program.

Ang una manukad sa Cebu City Hall, Robinson’s Galleria, Cebu Business Park ug Asiantown I.T. Park.

Samtang, ang ikaduhang rota, gikan sa Paseo Arcenas sa Banawa, dan B. Rodriguez, Fuente Osmeña, Gorordo Avenue, Cebu Business Park, Mabolo dayon lahos sa Sykes ug pabalik.

Si Ouano niawhag sa operator sa modernong mga sakyanan nga makigtinabangay tali sa local government unit aron hapsay ang ilang pagdagan labi na dagko ang maong klase sa mga sakyanan nga posibleng makaapekto sa kahimtang sa dagan sa trapiko sa kadalanan sa maong mga rota.

Karong adlawa, Nobiyembre 26, ilusad sa Department of Transportation (DOTr) ug Land Transportation Franchising and Regulatory Board (LTFRB) ang bag-o ug modernong mga sakyanan nga pasaheroan atol sa kalihukan sa Robinson’s Galleria Cebu, siyudad sa Sugbo.

Sigon ni LTFRB 7 assistant regional director Reynaldo Elnar gipaabot motambong sa launching si DOTr Assistant Secretary Mark de Leon ug LTFRB chairman Martin Delgra III.

Di pwede modiretso lang sila, expected ang heavy traffic karon, hangyo nga i-coordinate nato sa LGU.” - Francisco Ouano, CCTO chief