Maayong andam

Sa mga butang o hitabo nga umaabot nga dili nato matagna, importante nga kabahin ang pagpangandam bisan ginagmay o dinagkong lakang. Buot hunahunanon, bisan ang pagpakabuhi nato ning kalibotan dako parte sa pagpangandam alang sa pagpuyo sa malahutayong kalipay sa kiliran sa magbubuhat subay sa panglantaw sa mga Kristiyano.

Dalaygon ug gihangop ang gihimo ni Chief Supt. Debold Sinas, direktor sa Police Regional Office (PRO) 7, bahin sa pagpakaban sa seguridad sa Basilica Minore del Santo Niño nunot sa nagsingabot nga Pasko ug Piyesta sa Sugbo, Sinulog Festival 2019, sa pagdili na sa pagdala og backpacks ug mga dagkong bag kon mosulod sa compound.

Kini ang ipatuman sugod sa novenaryo sa kasauligan sa Fiesta Senior nga gisuportahan usab ni Cebu City Councilor Dave Tumulak, chairman sa peace and order council, alang sa seridad sa bagang duot sa mga deboto sa Niño ug kini mas magkadagahan samtang magkaduol ang iyang pyesta nga matag ikatulong Dominggo sa Enero.

Ang nakalisod kay walay deposit area sa dagkong bag sa Basilica. Kon dunay madala'g backpack, dili na kini palinyahon ug mas madali ang pagsulod sa mga tawo human dili malangay sa inpeksiyon sa bag.

Kon dunay mga deboto nga gikan sa lagyong lugar modiretso na sa pagsulod sa simbahan nga magdalag dagkong bag, ila kining abugon. Kon sa milabayng Sinulog estritko ang kapulisan sa mga tawo nga mosulod sa Basilica, ila kinig patas-an karon.

Lakip sa ilang idili sa pagdala og backpacks atol na sa mga processions nga himuon sama sa Walk with Mary ug Solemn Procession. Gituyo ni Sinas nga iyang ipahibalo ning sayo pa lang aron dili mahinayak og dala og backpacks o dagkong bags ang mga deboto o kadtong mga turista mga mosulod sa Basilica.

Dili nato matagna ang kausaban sa panahon. Ang mga dautang elemento dili mopili og oras ug dapit. Salamat sa pagpakabana.