Moderno nga ‘hari sa karsada’

Ang jeepney giila nga maoy “hari sa karsada.” Mao kini ang gisaligan sa kadaghanan sa mga sumasakay sa adlaw-adlaw nga biyahe gikan sa gipuy-an ngadto sa trabahoan, sa eskuylahan, sa pagpangompra ug uban pa.

Ginaingon nga ang matag Pinoy nakasakay gyud og keepney sa iyang kinabuhi bisan sa usa lang ka higayon lang. Si kanhi Cebu City Mayor Mike Rama nagpahulagway nga nisakay og jeepney apan napildi lang siya sa miaging eleksyon.

Ang kadaghanan sa mga public utility jeepneys (PUJ) karaan na. Ang uban mobuga og itom kaayong aso. Mao nga gilusad ang public utility vehicle modernization program sa Department of Transportation (DOTr) ug Land Transportation Franchising and Regulatory Board (LTFRB).

Agig tubag sa maong programa, magsugod karong semanaha pagbiyahe dinhi sa syudad sa Sugbo ang unang 22 ka mga airconditioned nga modernong PUV sa BEEPositive, nga gipadagan sa Persano Corporation nga nagbase sa Quezon City.

Ang mga moderning jeepney morag mga mini coasters, dunay seating capacity nga 24 ug 10 ka standing passengers. Dunay kiniy 72-hour functional dash camera, speed limiter device, global positioning system, automated fare collection ug libreng WiFi sa mga pasahero.

Moabot sa kinatibuk-an og 40 ka units ang ipadagan nga mga moderning jeepney dinhi sa syudad sa Sugbo. Apan 22 lang una kay ang 18 wa pa madeliver tungod sa bagyong Samuel.

Si Reynaldo Elnar, assistant regional director sa LTFRB 7, niingon nga ang modernong mga PUJ units kay mosubay sa duha ka bag-ong mga rota nga giablihan. Ang unang rota manukad gikan sa Cebu City Hall, moagi sa Robinson's Galleria dayon sa Cebu Business Park lahos sa Asiatown I.T. Park ug pabalik.

Ang ikaduhang rota, gikan sa Paseo Arcenas sa Banawa, moagi sa may Happy Valley lahos sa B. Rodriguez, Fuente Osmeña, modiretso sa Ramos, dan D. Jakosalem, Gorordo Avenue, moagi sa Ayala, dayon sa Panagdait sa may Landers, lahos sa Sykes ug pabalik.