As high as the heavens
Kahilakon gyud ko. Morag katulgon ang tingog sa babaye. Mora bag gikapoyan siya. “Natu’og si Rommel. Nia mi ron sa su’od sa motel.”
Nakalit kog pawong ang akong selpon. Wa gyud ko masayop sa akong pagtuo, girlfriend ni Rommel ang maong babaye. Ang nakapasakit pa gyud sa akong dughan kay kauban sila karon sa sulod sa usa ka motel.
Mipauli ko nga huot kaayo ang akong dughan sa kaguol.
Pagka gabii, gisuginlan ko si Sandra sa tanan. Migakos ko niya. Naghilak ko sa iyang dughan. Naghilak sab ang akong igsuon. Klaro nga naluoy siya nako. Wa ko makamatikod nga nasuko siya nako.
“Atong sultihan sila si Mama ug Papa ani, Te Sheena.”
Hinay kong mitando. Angay tuod masayod ang among mga ginikanan sa nahitabo nako. Giubanan ko ni Sandra sa pagpakigsulti ko sa among mga ginikanan. Diha na sila sa sulod sa ilang kuwarto. Wa dayon makatingog sila si Mama ug Papa. Nagkatinan-away sila. Naghuwat ko nga ilang kasab-an, nga ilang pasakitan.
Apan wa kini mahitabo. Gigakos nuon ko ni Mama. Naghinilakay mi. Iyang gihapuhap ang akong buku-buko.
“Di si Rommel ang laki nga para nimo, Sheena. Kalimti siya.”
Hinay ang tingog ni Papa. Nagpasalamat ko nila ni Mama ug Papa nga nakasabot sila sa akong sitwasyon.
“Gihatag sa Dios nato nang gisabak nimong bata, Sheena. Pakatawha kana ug atong alimahan ug panggaon.” Nagpahiyom si Mama nako. “Oo, Mama.” Nanglabay ang mga adlaw. Wa na mi komunikasyon si Rommel. Wa ko na sab siya kinahanglana. Inanay ko nang nadawat nga di gyud mi para sa usag usa. Dali ra kong naka-move on.
“Klaro na ang imong tiyan, Te Sheena.”
Malipayon si Sandra samtang nanglingkod mi sa among lawn usa ka hapon ana nga wa mi klase. “Bitaw, Sandra.” Malipayon sab ko nga mihapuhap sa akong tiyan. Unya nahinumdom ko sa akong nakita kanila ni Sandra ug Alex.
“Kining, Sandra, kagahapon ba, nakita ta mo si Alex nga nag-holding hands nga nanglakaw sa Colon. Nasundan ta mo.“
“Gisugot ko na siya, Te. Nangulitawo man siya nako.”
“Buotan si Alex, Sandra. Mahala siya.”
Mitando si Sandra. Nakita ko sa iyang nawong ang tinudanay nga kalipay.
(KATAPUSAN)