ALA FIGHTERS NAKASUGAKOD SA MEXICANS
Nasugakod ni ALA fighter Jeo ‘Santino” Santisima ang kalig-on ug kaagresibo sa iyang Mecican challenger nga si Uriel Lopez aron depensaan sa labing unang higayon ang iyang World Boxing Organization (WBO) Oriental super bantamweight title sa main event sa Pinoy Pride 45: Quest for Greatness boxing promotion niadtong Sabado sa gabii sa IEC Convention Center sa brgy. Mabolo, dakbayan sa Sugbo.
Mao-mao sab nga kasinatian ang naagian sa stablemate ni Santisima nga si Kevin Jake Cataraja sa iyang kadaugan batok sa laing Mexican nga kontra nga si Hugo Reyes sa ilang WBO World Youth super flyweight title bout sa undercard.
Si Santisima, kinsa mipaundang og 13 sa iyang katapusang 14 ka mga kontra, kanunay lang makapatugpa og makusog nga kumo sa bodega ug nawong ni Lopez gikan pa lang sa sinugdanan apan wala gyud natumba ang Mexican.
Tuod man, midominar si Santisima sa scorecards sa tulo ka judges, 117-111, 118-110, 118110, aron irehistro ang unanimous decision nga kadaugan.
Si Santisima misaka sa 17-2, 14KOs nga rekord samtang si Lopez natagak sa 14-7-1, 6KOs nga baraha.
Sa 8th round, adunay mga higayon nga mibarag na si Lopez apan padayon gihapon kini sa pag-ataki ug sige’g pauwan og tikdol-tikdol lang nga mga kumo nga maoy iyang gibuhat gikan sa sinugdanan.
Sa 10th round, mibarag na sab si Lopez apan wala gihapon kini miundang sa pag-asdang. Ning higayuna, tatawng naluya na sab si Santisima.
Mao-mao ra gihapon ang senaryo sa nahabiling duha ka rounds. Sa iyang bahin, si Cataraja nakapasulod dayon og solidong mga kumo sa sayong bahin sa away nga tatawng nakapatay-og kang Reyes.
Mao-mao ra ang mga senaryo sa nagsunod nga rounds ug daw gipanghilam-os lang ni Reyes ang mga kumo ni Cataraja hangtod nahuman ang away.
Midominar sab si Cataraja sa scorecards, 99-91, 99-91, 100-90, aron angkunon ang kadaugan sa labing una niyang world regional title bout.
Giinat ni Cataraja ang iyang rekord sa 9-0, 7KOs samtang si Reyes nahagbong sa 9-2-1, 7KOs nga baraha.
Sa laing title bout, yanong miposte og 1st round knockout nga kadaugan ang laing ALA fighter nga si Prince Albert Pagara batok kang Ghanian George Krampah aron depensaan ang iyang WBO Inter-Continental super bantamweight belt.
Si Pagara misaka sa 31-1, 22KOs nga baraha samtang si Krampah nalukapa sa 14-4, 12KOs nga rekord.
Sa laing giatangang away, miresulta sa majority draw ang away nila ni King Arthur Villanueva ug Carlo Demecillo.
Sa lain pang mga parisan, ningdaog sila si Jonas Sultan batok Ardin Diale (UD), Fil-Japanese Go Hosaka batok Jason Tinampay (UD), Lorenz Ladrada batok Audie Dacua (UD), Regie Suganob batok MarkTorella (TKO 2).