JAIL GUARD GITIPI
GUARD SA CPDRC GIPUSIL-PATAY SA HAPPY VALLEY
Pagdumot maoy hinungdan nga gipusil-patay ang
jail guard sa Cebu Provincial Detention and Rehabilition Center (CPDRC) kagahapon sa kaadlawon, Nobiyembre 25.
Mao kini ang gitan-aw nga motibo sa kapulisan sa kasong pagpatay ni Jessie Billiones Castañares, 33, residente sa E. Sabellano St., Brgy. Quiot Pardo, dakbayan sa Sugbo.
Gipusil-patay ang biktima sa eskina Limkakeng ug dan Happy Valley, Brgy. Guadalupe, siyudad sa Sugbo, alas 2:25 sa kaadlawon.
Usa ka prison guard 1 ang biktima kinsa duha ka mga wala pa mailhi nga mamumuno ang mipatay niini.
Sa pakisusi sa Guadalupe Police Station, patay dihadiha si Castañares nga gipusil sa riding-in-tandem samtang nagsakay usab kini sa iyang motorsiklo.
Paingon sa Labangon area ang maong jail guard dihang gisundan ug gipusil kini sa makadaghang higayon sa mga mamumuno.
Nasayran base na usab kaubang jail guard niini nga nagkaestorya pa sila sa biktima alas 2:00 sa kaadlawon sa Vicente Sotto Memorial Medical Center (VSMMC) diin naa ma-assign si Castañares isip gwardiya sa na-admit nga inmates.
Nakaangkon og samad sa iyang nawong ang biktima nga milahos kini sa iyahang ulo.
Nagsul-ob og jacket ang duha ka mga mamumuno nga nagsakay sa blue nga scooter.
Nakuha gikan sa crime scene ang usa ka 9mm nga pistol, unom ka kabhang sa .45 ug mga gamit ni Castañares.
Samtang, ang warden sa CPDRC nga si Reynaldo Valmoria nakugang sa insidente.
Dugang niini nga alas
11 sa gabii ngadto sa alas 7:00 sa buntag ang shift ni Castañares sa VSMMC.
“Nahibung gyud ko kay ting-duty man unta na niya. Gaunsa man diay na siya didto?” si Valmoria dihang nahinabi sa SunStar Cebu.
Matod sa warden nga wala siya makapangasaba sa maong jail guard sukad siya nilingkod niadtong Mayo.
Apan atol sa panahon ni kanhi CPDRC warden Bobby Legaspi, usa si Catañares sa 12 ka mga jail guard ug empleyado sa maong prisohan nga gisuspenso ug gipaubos sa imbestigasyon human sa giingon nga kalambigitan niini nga pagpalusot og kontrabando sa maong prisohan.
Apan nagdumili si Valmoria sa pagpangagpas nga mao ni ang rason sa kamatayon sa jail guard.
LAING HITABO
Usa ka retired police officer ug wala mailhing kauban atol ning pagsuwat ang gipangpusil-patay atubangan sa usa ka mall sa Barangay Tabunok, Talisay City kagabii, Nobiyembre 25.
Giila ang pulis nga si SPO1 Edgar Causon ug laing kauban ang gipamusil sa nagsakay og motorsiklo.
Ang duha patay dihadiha. Ang kapulisan naghimo pa og pakisusi sa hitabo.
Nasayran nga dihang wala pa moretiro, si Causon nadistino kini isip traffic cop sa Talisay City.