Abli na ang duha ka dan sa underpass sa Brgy. Mambaling sugod kagahapon, trapik gihapon?

Gipaagian na ang tagsa ka karsada paingon sa habagatan ug amihanan sa nagpadayo nga katukoran sa underpass sa Barangay Mambaling, dakbayan sa Sugbo sugod kagahapon.

Kini ang gibutyag ni Francisco “Isko” Ouano, operation

head sa Cebu City Transportation Office (CCTO) dihang ilang giablihan alang sa twoway traffic ang lugar sugod alas 10:30 kahapon sa buntag, Nobiyembre 25.

Si Ouano niingon nga karon pa untang buntag ablihan sa WT Construction ang duha ka

lane apan dihang iyang gisusi ang dapit, mahimo na kining magamit hinungdan nga iyang gipaagian na og sakyanan.

Ang hepe sa operasyon sa CCTO niingon nga dako kini og ikatabang sa pagluag sa dagan sa mga sakyanan nga moagi sa maong lugar sanglit dili na magtapok sa E. Sabellano ug Cabreros-Tagunol nga maoy alternatibong kaagian nga dan.

Gipadayag ni Ouano nga karong adlawa ang ilang gipaabot nga mobul-og ang daghang sakyanan gumikan sa klase sa mga tinun-an.

Gihatagan og prayoridad sa CCTO nga makaagi sa maong dapit ang mga public utility

jeepney nga magkarga og nga pasahero hilabi na panahon sa tingsulod sa trabaho.

Ang mga bus, minibus ug ubang dagko nga sakyanan adto pa gihapon sa South Road Properties (SRP) paagion.

Ang WT Construction anaa na sa phase 5 sa 700 metros nga underpass kinsa proyekto ni Kongresista Rodrigo Abellanosa nga gigahinan og dul-an P700 milyones nga pundo sa national government.

Ang maong proyekto maoy gilauman nga makahatag og solusyon sa problema sa trapik sa maong lugar. / PAC

/ ALLAN CUIZON ■ UNDERPASS: Mao kini ang aerial view sa gitrabaho nga underpass sa Mambaling, dakbayan sa Sugbo diin abli ang duha ka mga dalan sa kilid niini.