Sangalang wala na sa RP Team

Opisyal nang natangtang si Ian Sangalang sa 20-man Team Pilipinas training pool alang sa 5th window sa 2019 Fiba World Cup Asian qualifiers.

Mismong si national coach Yeng Guiao ang nipabuhagay niini sa Spin.ph.

Si Sangalang nagpas-an pa og dakong obligasyon sa Magnolia Ang Pambansang Manok Hotshots nga nakasulod sa finals sa Philippine Basketball Association (PBA) Governor’s Cup batok sa Alaska Aces hinungdan nga wala pa kini nakatunga sa training pool.

“I don’t think makakahabol pa siya kasi ayun nga, he was battered in the semifinals. Alam namin doon sa series na yun, bugbugan ang labanan nila nila Japeth (Aguilar) and Greg (Slaughter), and I can understand,” matod ni Guiao, kinsa nagtumbok sa semi-finals nga tahas sa Hotshots sa Governor’s Cup.

Si Sangalang nipahibalo sab kang Guiao nga aduna siya’y gipamating sakit sa iyang tiil human sa semi-finals sa PBA Governor’s Cup.

“Yung sa Achilles ko tsaka yung knee, sa may ACL ko, may nananakit. Kasi rin siguro sobrang pagod nung series namin sa semis,” pasabot ni Sangalang.

“Kailangan ko talagang sigurong alagaan yung sarili ko para 100-percent fresh going to the finals.”

Hinuon bisan wala si Sangalang, dili magproblema si Guiao sa pagkuha og haligi sa ilawom nga bahin gumikan kay abunda niini ang iyang training pool.

Naa sila si JuneMar Fajardo, Greg Slaughter, Japeth Aguilar, Arwind Santos, Troy Rosario, Beau Belga, JP Erram, Kai Sotto, ug Fil-German forward Christian Standhardinger.

Ang gipormang training pool ni Guiao giingon nga maoy labing tag-as nga RP squad sukad-sukad.