MANANAGAT MISUKOL SA PULIS, 1 PATAY
Patay ang usa ka mananagat samtang nasikop ang laing kauban niini human makigpinusilay sa mga pulis sa dihang gibadlong sila nga dili mangisda duol sa fish sanctuary sa Barangay Atop-atop, lungsod sa Daanbantayan niadtong buntag sa Dominggo, Nobiyembre 25.
Giila ang namatay nga si Arnel Derder Marabi, 33, nga taga Hilantagaan, lungsod sa Santa Fe.
Nadakpan si Michael Dela Cruz Dignos, 38, taga Hilantagaan ra usab.
Ang kapulisan sa Daanbantayan milusad sa ilang pagpatrolya sa kadagatan nunot sa nadawat nga report nga adunay illegal nga managat sa maong lungsod.
Ilang naatlan ang dili mominos 10 ka mga mananagat namasol sa gidili nga dapit sa kadagatan sa Atop-atop nga giila nga marine sanctuary.
Giingong misukol si Marabi.
Matod sa pulis, unang nagpabuto si Marabi gamit ang sumpak nga maoy hinungdan nga mibawos ang mga pulis ug ilang naigo si Marabi.
Daling nanibat ang uban nga nanagat gamit mga pump boat pahilayo sa mga pulis. Ang napusilan nga si Marabi gidali pagdala sa Bantayan District hospital apan patay na kini pag-abot.
Matod sa hepe sa Cebu Provincial Police Office nga dugay na nga problema ang ilegal nga panagat sa sa Daanbantayan ug sa isla sa Bantayan.
Bisan sa mga marine sanctuary wala motuman ang ubang mananagat gani ang uban kanila nagkupot na og armas aron ihulga sa mga barangay tanod nga mobadlong kanila.
Tungod niini, nakig-alayon na ang kapulisan sa Philippine Coast Guard (PCG) ug sa PNP Maritime unit aron mabadlong kining padayon nga illegal fishing sa probinsya sa Sugbo.
“We have been receiving reports and isang experience sa ating kapolisan dun at times na kung di sila pinuputokan is binabangga po lalo na kapag maliliit yung bangka ng kapulisan,” matod ni Abrugena.