12 ka moderno nga PUVs unang mobiyahe
Pinaagi sa giluwatan nga provisional authority sa ulohang buhatan sa Land Transportation Franchising and Regulatory Board, makabiyahe na og sugod ang pasiunang 12 sa 40 ka modernong public utility vehicles (PUV) bisan kon way travel line gikan sa Cebu City Transportation Office.
Apan sumala ni Atty. Vigor Mendoza, chairman sa Persano Corporation (PC), nga mangayo gihapon sila og travel line gikan sa CCTO diin ang ilang local group, ang Cebu Integrated Transport Multipurpose Cooperative (Citrasco), maoy nakig-alayon sa Cebu City Government ug CCTO aron maisyuhan niini.
Bisan kon may pagtugot na gikan sa LTFRB, matod ni Mendoza, dili pa sila mobiyahe og sugod kay maghuwat sila nga mahuman ang pagbansay sa mga drayber sa Citrasco karong Huwebes o Biyernes. Ang Citrasco maoy modumala sa operasyon.
Sigon niini mahinungdanon nga mapaubos sa training ang mga drayber kabahin sa maayong pamatasan ngadto sa mga pasahero, pagsul-ob og uniform ug insaktong hitsura kon mamasahero.
Si LTFRB chairman Martin Delgra III namahayag nga dili na magkinahanglan og travel line ang 40 ka bag-o ug moderno nga mga PUV sa PC nga gilusad kagahapon, Nobiyembre 26, 2018 sa Robinsons Galleria Cebu.
“In so far as LTFRB is concerned, pag naa na tay provisional authority makabiyahe na ta,” pagtino ni Delgra sa pakighinabi sa mga tigbalita sa Sugbo, nga balido sud sa 90 ka adlaw.
“But we hope within the 90 days ma-process na pud tong CPC (Certificate of Public Convenience),” matod ni Delgra, kinsa nidugang giisyu nila ang PA aron mapadagan na ang maong mga PUV samtang gipaabot ang prangkisa.
Sa pagkakaron, P8 lang una ang pletihan sa modernong mga sakyanan nga ipaagi una og cash, apan, sa moabot nga mga adlaw automated na ang pletihan nga maggamit og card.
Ang maong mga sakyanan ginama sa Russia ug China diin matag usa nagkantidad og P2.6 milyones.
Ang ginama sa Russia nga puti ang color masud ang 30 ka mga pasahero, apil ang magbarog, samtang 34 ka mga pasahero sa ginama sa China nga color blue, apil ang magbarog.
“This is the first of its kind in the entire Philippines, dito po magsisimula sa Cebu. We’ve got the best of Europe and the best of China and we brought it down here in Cebu,” pamulong ni Mendoza.
Sa iyang pakigpulong, siya nisaysay nga tulo ka mga presidente ug upat ka mga kalihim sa Department of Transportation and Communication nga karon Department of Transportation ang naagian aron masugdan dinhi sa Sugbo ang modernization program sa publikong mga sakyanan.
Ang unang rota manukad gikan sa Cebu City Hall, moagi sa Robinson’s Galleria dayon sa Cebu Business Park lahos sa Asiatown I.T. Park ug pabalik.
Samtang, ang ikaduhang rota, gikan sa Paseo Arcenas sa Banawa, moagi sa may Happy Valley lahos sa B. Rodriguez, Fuente Osmeña, modiretso sa Ramos, dan D. Jakosalem, Gorordo Avenue, moagi sa Ayala, dayon sa Panagdait sa may Landers, lahos sa Sykes ug pabalik.
Si Mendoza nidugang nga wala pa silay giila nga bus stops sa mga PUV diin mopahigayon sila og dry run human sa training sa mga drayber karong Huwebes o Biyernes.
Si Delgra namahayag nga nahitabo na gyud ang dugay nang gidamgo nga makabaton og hamugaway, luwas ug nindot nga publikong mga sakyanan ang mga Pinoy nga mga sumasakay.
Si Mark Richmund de Leon, undersecretary for road transport and infrastructure sa DOTr, namulong ang launching sa modernong mga PUV maoy sinugdanan sa modernisasyon nga ang tumong ang kahayahay ug katunhay sa pagsakay sa mga pasahero.